Gaenh bi daeuj, Bingzgoj Yen ciuq aen fuengcim“henhoh guhdaeuz, ciengjgouq daih’it, hableix leih- yungh, swnjcienz fazcanj”, aeu cosih mizyauq, haenqrengz henhoh vwnzva Fwenleux Bouxcuengh, aeundaej cwngzyau yienhda.

It dwg gyoebcomz duivuj ciengjgouq, daengz ndawbiengz cam canghfwen, caz rox cingcuj canghfwen ndaw yienh. Dangqnaj gaenq guhsat hong geiq liux daengx yienh 12 aen yangh(cin) 120658 boux ciengqfwen、37 boux canghfwen、4 bouxswnjcienz, caemhcaiq youq 2007 nienz laeb Fwenleux hezvei.

Ngeih dwg cingj conhgyah daeuj gaujcaz, caeuq gyoengq yozcej dangdieg doengzcaez cingjleix Fwenleux ndawbiengz, okbanj saw fwenleux. Gonqlaeng ok《Fwenleux Bouxcuengh Bingzgoj》、《Fwenleux Goksa》、《Fwenleux Bouxcuengh Yenzgiu》daengj.

Sam dwg cujciz daengx yienh doenghboux guh hong vwnzva nem bouxciengqfwen canghfwen dauq laeb 11 aen hawfwen conzdungj, dawz Gojva Cin Nazyungz Cunh、Buyungz Cunh、Daibingz Cin Mbanjdaibingz、Mbanjgizcangz、Lungzcuz Cunh Mbanjlungzliuj dinghguh doenghgij cunh mbanj cungdenj fwenleux. Fwenleux youh haeuj mbanj haeuj ranz, hawfwen haemh cugmbaek hoizdauq.

Seiq dwg gawjhengz gak cungj hingzsik fwenleux doxdax. 2006 nienz gawjhengz daih’it gaiq Fwenleux fwenvuengz doxdax, gungh bingz ok fwenvuengz 9 boux、canghfwen 9 boux, caemhcaiq dingh 19 boux canghfwen wnq guh“fwenvuengz yungzyi”. Dangqnaj doenghboux fwenvuengz neix mizmbangj baenz le bouxdaeuz swnjcienz fwenleux.

Haj dwg beizyangj buek cujhoz moq ciengq Fwenleux haenx. Fuz hwnj“Hahliuz Yozdui”daengj buek yozdui dangdieg. Geij bi daeuj, doenghgij yozdui neix lai baez ok rog gih、rog guek camgya gak cungj vwnzyi vanjvei, mingz riuz lajmbwn.

(Lij Gyanghlanz)