Gwn daeuhfouh doiq ndang vunz miz ndeicawq, danhseih bouxlaux gwn daeuhfouh daiq lai cix mbouj ndei lo.

Daeuhfouh hamz miz lai cungj veizlieng yenzsu ndang bouxlaux noix miz haenx, lumj diet、gai、linz、meij daengj, ndawde youhciz danbwz hix mizleih bouxlaux dungxsaej hidungj goengnaengz nyieg supsou. Ndawde swjgizsu doenghgo doiq fuengzceih ndok soeng ndok byoiq miz haemq ndei cozyung. Ciengz gwn daeuhfouh lij ndaej bouj ndaw ik heiq、siu hwngq nyinh sauj、seng raemx gaij hozhawq、cing seuq dungxsaej.

Daeuhfouh yienznaeuz ndei gwn, danhseih mwh gwn seiz hix miz gimqgeih. Danghnaeuz gwn daiq lai, danbwzciz rox laengzdangj ndang vunz supsou diet, bouxlaux yungzheih baenz aek ciengq、baenzsiq; gwn daeuhfouh daiq lai lij rox hawj ndaw ndang huqfeiq demlai, gyanaek aenmak fudanh; ndaw daeuhfouh hamz byauling haemq lai, bouxlaux baenzin caeuq bouxlaux lwed niusonh gwd gwn lai rox yaeuhfat baenzin moq. Bouxlaux moix singhgiz gwn daeuhfouh 2 daengz 3 baez ceiq ndei, moix baez gwn 100 gwz baedauq couh ngamj.