Ciuq baudauj naeuz, boux ndaeng ok lwed wnggai ciengz gwn di gijgwn liengz lwed、nyinh yaem、siu ndat he, neix ceiq ndei dwg gwn ngaeux lo.

Ngaeux diemz byoiq habbak, ndaej gwn ndip roxnaeuz cauj guh byaek gwn, gij ywyungh gyaciz de haemq sang, dwg cungj huqbouj ndei ndeu. Ngaeux hamz miz mba、danbwzciz、veizswnghsu B、veizswnghsu C、youzlauz、dansuij vahozvuz caeuq gai、linz、diet daengj lai cungj gvangvuzciz, noh de biz oiq, gwn ndip caeuq gwn makleiz feihdauh doxlumj. Cunghyih nyinhnaeuz, ngaeux gwn ndip ndaej liengz lwed sanq cwk, cawj cug gwn ndaej bouj sim ik mak, caemh ndaej nyinh yaem ciengx lwed. Ndaw ngaeux lij hamz miz veizswnghsu K gig lai, gwn de ndaej sousuk sailwed caeuq dingz lwed, ceiq hab boux ndaeng ok lwed、boux rueg lwed、boux nyouh ok lwed、boux haex ok lwed gwn.

Senj cawx ngaeux seiz wng senj aen biz hung、noh byoiq oiq、raemx lai youh diemz、daiq miz feihhom haenx. Doengzseiz, aenngaeux wnggai mbouj miz sieng、mbouj miz naeuh、mbouj bienq saek、mbouj miz diemj myaex、mbouj reuq suk、mbouj raek hoh, dingjsoem yied saeq yied ndei. Conhgyah daezsingj naeuz, boux aendungx siuvaq goengnaengz mbouj ndei caeuq boux baenzsiq mbouj hab gwn ndip.