Seizgan lumj raemx, miz haujlai saeh riengz seizgan siu deuz lo, hoeng, miz gienh saeh ndeu, hawj gou nanzlumz, caemh hawj gou gamjsouh daengz gij ndiepgyaez daxboh gig hungmbwk.

Ngoenzhaenx, gou caeuq gyoengq doih doxiu, itheij youq laj laeuz guh doxndoj. Laj laeuz miz gofaex﹑nyumqva﹑liengzdingz…… vanzlij miz giz dingzci, gig gvangq, habhoz gyoengqdou guh doxndoj, danghnaeuz mwngz mbouj sug giz deihfueng neix, yaek ra raen boux vunz ndeu gig hoj. Gyoengqdoih daengz caez lo, dou couh hainduj cou ciem, Daegdauh deng guh bouxra. Daegdauh couh ndwn youq laj liengzdingz geqsoq, dou couh bae ra dieg ndoj hwnjdaeuj. Vihliux ra giz deihfueng redrwdrwd ndeu, gou gizneix yawjyawj, gizhaenx yawjyawj, cungj mbouj muenxeiq. Daegdauh yaek geq sat lo, gou lij caengz ra raen giz ndoj, simvueng dangqmaz. Cingqdang gou mbouj miz saekdi banhfap seiz, fwt yawjraen aen gang ndeu, “deng lo, couh ndoj youq gizneix!”Gou angq ndaej ca di hemq ok sing， ganjvaiq buet gvaqbae. Hoeng, bouxlawz rox dangnaj miz ngauq rin ndeu, gou mbouj siujsim, deng daemjndoet, cingqndei laemx roengz nga faex daengj hwnjdaeuj ndeu, in dwk gou youq gizhaenx swenjyuyu, lwed sikhaek daj gyaeujhoq lae roengzdaeuj, gou lau dwk naengh youq gizhaenx swenj daej hwnjdaeuj. Gyoengqdoih dingqnyi gou daej, ganjvaiq buet gvaqdaeuj, raen gij lwed gou lae mbouj dingz, caemh vueng lo, youq gizhaenx cienq bae cienq dauq, mbouj rox yaek baenzlawz guh, lij dwg Daegdauh siengj daengz, ganjvaiq buet okbae.

Yaep ndeu, daxboh daxmeh gou cungj buet roengzdaeuj lo, raen gou naengh youq gizhaenx, ndwn cungj mbouj ndaej, daxmeh ganjgip umj gou, nai naeuz:“Mhouj youqgaenj law, gaej daej lo!” Dingq daengz neix, gou engq daej lo, daxboh mbouj gangj saek coenz, de goengzyongq roengzdaeuj, siengj yawj giz sieng gou, hoeng, gou lau in, dai lix hix mbouj hawj daxboh yawj. Daxboh huj lo, lumj duzguk nei swenj naeuz:“Mwngz dwg boux vunzsai ndeu, roebdaengz di saeh yienghneix, couh daej mbouj dingz, suenq gijmaz vunzsai! Sikhaek dingz roengzdaeuj!”Gou lau lo, sikhaek dingz roengzdaeuj, song cehda yawjyawj daxmeh, maqmuengh de bang gou gangj song coenz vahndei. Daxmeh raen yienghneix, naeuz doxboh:“Mwngz swenj gijmaz ne, de cungj in dwk hwnq mbouj ndaej lo……”“Mwngz caiq gangj, lienz mwngz hix deng in!”Daxboh hujdengdeng dwk naeuz. Daxmeh mbouj caiq gangjvah lo, mwhhaenx ndawsim gou in dangqmaz: Daxboh doiq gou baenzneix yak, gou baenz in de cungj mbouj gangj saek coenz unq, nanzdauh gou mbouj dwg de caenseng? Cingqdang ndawsim gou baenzeix siengj seiz, daxboh yawj gij sieng gou, naeuz:“Baksieng gig hung, aeu nyib mae cij ndaej.” Gangj sat couh aeu diuz buh de cug dawz gyaeujhoq gou, umj gou hwnj gwnz ci, hai ci soengq gou bae yihyen lo.

Daeuj daengz bakdou yihyen, gij heiq raemx siudoeg cung haeuj aen ndaeng gou daeuj, gou youh siengj daengz yaek nyib mae, nyaenx mbouj ndaej daej hwnjdaeuj. “Daej gijmaz daej, lij caengz nyib mae ne, mbouj cinj daej!” Daxboh swenj naeuz. Caj daxboh bae gyau ngaenz seiz, gou caegcaeg cam daxmeh:“Meh, daxboh doiq gou caen yak, de dwg mbouj dwg bohlaeng gou ha?”Daxmeh riu lo,naeuz:“Mwngz siengj gvaq lawz bae lo? Mwngz dwg lwg caen seng de, mboujgvaq, daxboh mwngz miz di beizheiq gaenj, cij doiq mwngz swenj hemq, gizsaed de dwg gaenjcieng mwngz, gyaez mwngz.”Mwhhaenx, gou rox lo, doengh gij neix caemh dwg cungj gyaez daxboh, de dwg vihliux gujli gou, hawj gou mbouj lau hojnanz, hag rox gwzfuz hojnanz, caencingq guh boux vunzsai ndeu, cij doiq gou swenj hemq.

Gvaq yaep ndeu, daxboh baegfofo dwk buet gvaqdaeuj naeuz:“Vaiq gvaqbae, lwnz daengz gyoengqraeuz lo.”Gangj sat, couh umj gou gvaqbae hawj canghyw siudoeg, yienzhouh cinjbei nyibcim. Dang gou raen fag cim myigyamyam haenx seiz, lau dwk daengx ndang saenz mbouj dingz, gou cix mbouj gamj daej, lau deng daxboh ndaq. Daxboh yawjyawj gou, naeuz:“Di in neix iq law, haebhaeb diuz heuj, laeplaep lwgda, yaepyet couh gvaqbae lo. Danghnaeuz caen dingj mbouj ndaej, mwngz couh gaem cik fwngz gou.”

Nyibcim seiz, gou roxnyinh gig in, aenvih canghyw aeu cim youq gwnz gyaeujhoq gou nyib, hoeng, gou youh mbouj roxnyinh in, aenvih daxboh maenhcwdcwd ndwn youq henz ndang gou, gou gaem cik fwngz de, roxnyinh sim gig onj, roxnyinh ndawsim raeujrubrub, caiq hix mbouj roxnyinh in lo.

Gij ndiepgyaez daxboh, dwg saedsaed caihcaih, mbouj miz saek gawq vah gyaeu, mbouj miz saek gaiq dungcoz caenmaed; gij ndiepgyaez daxboh, dwg caemrwgrwg, mbouj cigciep byaujdaz, miz seiz hawj vunz roxnyinh mbwq de. Hoeng, Gij ndiepgyaez daxboh youq ndaw sim gou yaenq ndaej ceiq laeg ceiq maenh.

(指导老师：黄素艳)