Betnyied cibngux daengz lo, gyoengq- vunz cungj yungh mbouj doeng fuengsik angqhoh ngoenzciet. Gou hix gig haisim, aenvih daxgux daengx ranz vunz yaek daeuj ranz gou gwn caeuz.

Betnyied cibngux ngoenzneix, daxbuz caeuxcaeux couh bae gwnzhaw cawx byaek lo. Daxboh daxmeh sousib aenranz, guh dwk seuqcingh cingjcaez, cang dwk gyaeundei dangqmaz. Gou gwn ngaiz le couh hainduj sij cozyez, gou siengj ganjvaiq guh cozyez sat le, lajbyonghngoenz couh ndaej haisim guhcaemz lo.

Lajbyonghngoenz, daeg nuengxbiuj gyoengqde daeuj lo, daxboh daxmeh buenx daxgux caeuq augux ndoet caz gangjgoj, gou rag nuengxbiuj haeuj rug gou bae guhcaemz. Daxbuz cawj caeuz.

Lajbyonghngoenz haj diemj lai cung, dou hainduj gwn caeuz lo. Va, byaekcaeuz caen lai! Miz baeu、 gungq、bya’ngaenz、nohsaz, lijmiz bit gug bizciuj gou ceiq gyaez gwn haenx dem. Baez nyouq, heiqrang bongh haeuj ndaeng daeuj, nyex gou myaiz laecancan. Aen byaek neix feihdauh caen daegbied, bizciuj caeuq nohbit cuengq itheij cawj le, feih nohbit engq rang engq diemz. Gou lij naeuz:“Gou gwn nohbit le rox mbouj rox laeujfiz ha?”Guenj de fiz mbouj fiz, byaek ndeigwn sien gwn cij gangj. Daengx ranz vunz doq gwn doq lwnhgoj, caen vaiqvued.

Gwncaeuz sat le, gyoengq vunzhung gwn nyiedbingj gwn mak gangjgoj, gou caeuq daeg buengxbiuj haeuj ndaw rugsaw bae yawj《Meuz Caeuq Nou》, ndaw ranz cungj dwg singriu.

Baez betnyied cibngux neix caen vaiqlag ha! Gou youq ndawsim gouz naeuz: Maqmuengh daengx ranz vunz ciengxlwenx vuenyungz、 bingzan.

(seiq nienzgaep Vangz Bingz)