□ Hoz Saubangj sij Cinz Siengzcouh Liuz Gingliuj Cinz Siengzgen hoiz

17、Baij Ndei Vut Yaez Mbefat Nungzyez

Lai bi daeuj, Swcigih dangjveij youq mbefat nungzyez fuengmienh, itcig ngeixyaeng caeuq damqra dwk: Dauqdaej Guengjsae miz fuengmienh lawz ak, miz fuengmienh lawz yaez, guhlawz ciuq gij cingzgvang mbouj doengz gak dieg bae ceidingh fuengfap habngamj, baij ndei vut yaez, youh ndaej gaijndei gwndaenj vunzlai, youh ndaej guh engq lai gung’yen hawj guekgya.

Veiz Gozcingh caeuq goengdaeuz wnq gih dangjveij byaij doh gak digih、si caeuq dingzlai yienh ndaw swcigih, ca mbouj lai liujgaij liux gij cingzgvang Guengjsae. Gij diuzgen swhyenz Guengjsae miz song aen daegdiemj yienhda: It dwg dingzlai dieg dwg diegyayezdai, mbwn raeuj, fwn cuk, haeux ndaej ndaem lai miuz, seiqgeiq baenzheu; ngeih dwg diegbya lai, goengqbya ngutngeu, aenndoi baizled. Song aen daegdiemj neix, gig hab ndaem doenghgogai、gofaex caeuq ciengx doihduz.

Guengjsae daihgaiq miz 2000 lai cungj yenzliu gunghyez、goyw、liengzyouz moegbonj daengj doxgaiq ndoengfaex canj haenx, ndawde mboujnoix huq youq ndawguek rogguek cungj miz itdingh hawciengz. Youzgyaeuq、youzcaz、soengyieng、batgak、youzveizyiengh、nyawhgveiq daengj, gig miz mbefat cenzliz.

Dieg hab ndaem faex haenx gig gvangq, gofaex youh maj ndaej vaiq. Gij gofaex haenx itbuen 15 bi cix baenzcaiz, go’gyaeuq ndaem 5-6 bi le cix baenzaen, gocazyouz ndaem ndaej 7-8 bi le cix ndaej sou, gocuk ndaem ndaej 3-5 bi le cix ndaej raemj daihbaj.

Gij dieg nywjbya gig gvangq, seiqgeiq cungj miz nywj, baenzbi ndaej ciengx doihduz. Ciengx duzvaiz、duzcwz、duzmax、duzyiengz daengj doihduz gwn nywj haenx, roengzngaenz siuj, sairengz noix, souhaeuj laux.

Dienheiq Guengjsae hab ndaem gooij, guh cangjdangz geiz caq youh raez, ndaej cungfaen fazveih gij naengzlig swnghcanj sezbi haenx.

(caengz sat)