(ciep geiz gonq)

Sai: Byaij soengz mbouj gaij singq dap coh,

Singq gou riengz boh heuh Veiz Giengz;

Mbanj gou youq baihlaj Byadiengz，

Gou couh ngaeq riengz mwngz hu nuengx.

Maengx mwngz boux vunz lumj goging,

Gou dan rox ning liugo’ngox;

Byaij soengz mbouj gaij singq dap coh,

Singq gou riengz boh heuh Veiz Giengz.

Mwngz nuengx aennaj maeq youh oiq,

Gou yax mbouj boiq ndaej song cingz;

Mbanj gou youq baihlaj Byadiengz,

Gou couh ngaeq riengz mwngz hu nuengx.

Mbwk: Seizneix ndawndoeng lai goging,

Go’ngox mwngz ning guhmaz raeuh,

Mwngz gip govaeng ndek gohaeux;

Couh lumj va’ngaeux cap haexvaiz.

Daengz mbanj Byadiengz raeuz ndeiangq,

Faenz liu raeuz nyangq lumj doq mbin;

Seizneix ndawndoeng lai goging,

Go’ngox mwngz ning guhmaz raeuh.

Vunz ndaem go’gyaj naz henz daemz,

Go’ngox byawz ndaem baiz go’gyaeuq;

Mwngz gip govaeng ndek gohaeux,

Couh lumj va’ngaeux cap haexvaiz.

Sai: Gou rox goging byauh youh sang,

Danhseih de cangz ndaw gyaz(caz) laux;

Seiqhenz miz gaeu lanz baedauq,

Mbouj hawj beg lauq aen goengrengz.

Bouxlawz mbouj gyaez dahsau gyangh (gyaeundei),

Bouxboux siengj lamx nanz caenx ndang;

Gou rox goging byauh youh sang,

Danhseih de cangz ndaw gyaz laux.

Lwgmak ndeigwn venj congh sang,

Duzgvej song gyangz mbouj gamj auq;

Seiqhenz miz gaeu lanz baedauq,

Mbouj hawj beg lauq aen goengrengz.

(caengz sat)