Mwh okyienh hawqsauj aenndang gamjdaengz mbouj cwxcaih seiz, ndaej habdangq gwn di gijgwn nyinh yaem nyinh bwt ndeu, lai gwn lwgmak caeuq byaekheu nem lai bouj gwn di raemx caeuq veizswnghsu yungz youq ndaw raemx haenx. Danhseih gaej gwn gva mak daiq lai, aenvih mbwn liengz aendungx bouxvunz lij haemq nyieg, gwn huqndip huqgyoet daiq lai rox hawj bouxvunz baenz dungxsiq.

Gij noh bya yungzheih hwnjhuj ceiq ndei siuj gwn, gwnndoet wng gwn cit guhcawj. Gwn haijsenh caeuq nohring seiz, aeu haeujsim gwn singjsien di. Gwn coeng、hing、suenq、byaekgep、lwgmanh daengj gij- gwn saujndat aeu habdoh, fuengz saujndat daiq lai hwnjhuj.

Daegbied haeujsim vei- swngh, aenvih ginggvaq seizhah mbwn ndat siuhauq, siuvaq goengnaengz ndang vunz gaenq mbouj daih ndei lo, rengz dingj bingh conghsaej haemq nyieg, danghnaeuz caiq gwn gijgwn mbouj veiswngh roengzbae couh gig yungzheih yinxhwnj baenz dungxsiq, bouxlaux、lwgnyez caeuq boux ndang haw engq aeu daegbied siujsim cij ndaej.

Seizcou mbwn liengz, vunz gwn ndaej doxgaiq lai, gwn haeuj gij ndat hix demlai, danhseih ngamq haeuj seizcou gyang- ngoenz hainduj bienq dinj, mbwn liengz vunz hix siuj yindung, gij ndat siu bae hix haemq noix. Ndigah ngamq haeuj cou aeu fuengz lanh gwn lanh ndoet, fuengz ndangnaek raemhswnh demgya daiq vaiq.