Baez daengz seizcou, gyoengqvunz cungj gamjdaengz naengnoh haenrwd, caemhcaiq lot naeng duet gyaep, bwn- gyaeuj roz mbouj ndongqrongh, begsienj lai, naengbak hawqsauj roxnaeuz dekleg, conghndaeng conghbak hawqsauj youqgaenj, haex ndongj haex geng. Mbangj bingh youq seizcou mbwn hawqsauj cozyung lajde, hix yungzheih fukfat roxnaeuz haeuj naek, lumj cihgi’gvanj mbehai、 feigezhwz daengj. Vihneix, baenzlawz an’onj doh gvaq seizcou, gag guh baujgen fuengz seizcou mbwn hawqsauj couh yienj ndaej cibfaen youqgaenj lo.

It dwg gibseiz dem gemj buhvaq. Laebcou gvaq le, hwnzngoenz vaendoh doxca haemq daih, mbouj hab lohgangh aenndang, hix mbouj hab daenj buhvaq daiq lai daiq raeuj.

Ngeih dwg lai gwn raemxgoenj、caz cit、raemxmak、cijvaiz.

Sam dwg lai gwn byaekheu singjsien caeuq lwgmak. Lij ndaej lai gwn di dangzrwi、beghab、cehmbu daengj yw cingbouj dem.

Seiq dwg siuj gwn gijgwn ciencaq manhget.

Haj dwg yawjnaek cingsaenz diuzleix. Boux yaem haw huj daep engq hoengh, doengh mbouj doengh couh fatheiq. Ndigah, yawhfuengz seizcou mbwn hawqsauj lingh aen hothoh couh dwg yawjnaek diuzleix cingsaenz, aensim bingzhuz doiqdaih sojmiz saehcingz, hawj bouxvunz caemcingx an’onj doh gvaq seizcou.