民语工作者要有思想有作为扎扎实实办实事

Bonjbauq siusik (gicej Vangz Sinhyungz) 9 nyied 12 hauh ban- ringzgvaq, Swcigih Minzveij Minzyij- veij cujyin Luz Yenbenj cujciz ciuhai aenhoih lwnh hong Minzyijveij, nyinhcaen dingq gak cusiz caeuq cizsuz danhvei aen veij neix lwnh hong bonjfaenh, sonyinx guh ndei gij hong geij ndwen satlaeng bineix caeuq hong bimoq. Swcigih Minzyijveij fucujyin Yangz Gijbyauh、Vangz Cenzcungh, bouxcucangj fucucangj gak cusiz caeuq doengh- boux banbouxdaeuz cizsuz danhvei camgya haihoih.

Youq gwnz hoih, mwh dingq gyoengqdaeuz lwnh gij hong geij ndwen satlaeng bineix, Luz Yenbenj sijsaeq cam gak hangh hong daegbied dwg hanghmoeg cungdenj yaek geijseiz guhsat、aeundaej gijmaz cingzcik caeuq lij miz maz gunnanz dem. De giengzdiuh, gij hong lij caengz guhsat haenx, itdingh aeu lauxlaux saedsaed guh ndei guhsat.

Luz Yenbenj naeuz, boux guh hong vah saw minzcuz aeu rox naemj gaenx guhsaeh, dangqnaj baihgwnz hawj ngaenz noix, hoeng danghnaeuz rox naemj, banhfap habngamj, hengzdoengh dawzbanj, vwndiz couh yungzheih gaijgez. Baenzneix, raeuz aeu genj geij hangh saehsaed daeuj guh ndei, saehsaed dwg vix gij hong vunzlai bauhamz bouxlauxhangz、bouxhwnjmuengx caeuq gij bumwnz caeuq raeuz miz lienzhaeh haenx muengh raeuz guh haenx, caemhcaiq dwg gij hong raeuz guh ndaej haenx, roxnaeuz gij hong raeuz mbouj miz banhfap guh ndaej hoeng ndaej daez genyi heuh cwngfuj anbaiz guh haenx. Baenzneix, gij hong raeuz guh ndaej haenx, aeu genj geij hangh ceiq youqgaenj daeuj nyinhcaen haenq- rengz guh ndei, hawj dangjveij cwngfuj caeuq sevei gak fuengmienh roxyiuj caemhcaiq haenh ndei dem.

Luz Yenbenj naeuz, bimoq yaek aeu comz gij rengz daengx aen Minzyijveij gihgvanh caeuq cizsuz danhvei, ca geij hangh saehsaed doiq daengzcog yingjyangj haemq hungloet haenx haenqrengz bae guh. De naeuz, youq cingjhab vangjloz saenqsik swhyenz fuengmienh, muengh Minz- veij Minzyijveij doxgap hwnjdaeuj, doenggvaq cingjhab bingzdaiz vangj- loz, guhbaenz aen vangjloz swhyenz caemhyiengj、 song mbiengj cungj souh’ik, hawj de bienqbaenz song veij aen conghcueng doiq baihrog guh senhconz akrem ndeu. Youq Sawcuengh yungh caeuq hag fuengmienh, aeu guh baez gak fuengmienh duzcaz ndeu, couhdwg bae duzcaz gij fazliz fazgveih、vwnzgen gvidingh gaenq miz gvaq haenx saedhengz cingzgvang, ndaej dawz gij yienghsiengq caensaed “miz fap mbouj hengz” haenx caz cingcuj le bauq hawj Swcigih Dangjveij Cwngfuj, daezok muengh cwngfuj yaek baenzlawz bae saedhengz cij ndei, coicaenh Sawcuengh laebfap. Guh beizyin seiz, ceiq ndei dem aen ban son Sawcuengh mienhyiengq gwnz sevei ciuseng ndeu, mienxfeiq beizyin, hawj yingj- yangjliz Sawcuengh gyahung gya- gvangq, daezsang gij sevei diegvih Sawcuengh. Hong Sawcuengh suij- bingz gaujsi, bimoq gauj sat le ceiq ndei cingj gyoengqvunz gak fueng- mienh bauhamz bouxlauxhangz daeuj guh lwnhcingq, nyinhdingh gij cwngz- goj Sawcuengh suijbingz gaujsi, yinx vunzlai gagnyienh hag yungh Saw- cuengh. Doengzseiz lij aeu dawz gij cwngzgoj neix sij baenz vwnzgen bauq hawj cwngfuj, daeznaeuz youq gij fuengmienh lawz ndaej doigvangq sawjyungh Sawcuengh, lumjbaenz bozswswngh、 gauj gunghvuyenz、bingz cizcwngh、gij gyauyuz dieg Bouxcuengh daengj. Hong gohyenz ne, aeu haeujsim guh ndei senhconz, aeu vih hingzcwng muzdiz fuzvu, aeu doenggvaq senhconz gohyenz cwngz- goj daeuj senhconz Sawcuengh, hawj vunzlai caez daeuj cihciz Sawcuengh.

Luz Yenbenj lij cungdenj gangj le hong cezmuz vah minzcuz gvangjbo densi. De naeuz, hangh hong neix gig youqgaenj, guh ndei le ndaej hawj gih raeuz gvangjbo yingjsi hangz neix yungh vah saw minzcuz haiboq guh yiengh ndei ndeu okdaeuj, ndigah, raeuz aeu yawjnaek de, haenqrengz bae guh ndei, aeu naek youq guh ndei diucaz yenzgiu、unglaeb cezmuz ndei、doidoengh dingh ok mizgven cwng- cwz、beizyangj yinzcaiz seiq hangh hong neix.

Doeklaeng, Luz Yenbenj vah naek cingz laeg dwk naeuz, seizneix gwnzbiengz miz haujlai vunz haengj- gyaez Sawcuengh, raeuz aeu hawsim bae dingq gak cungj yigen caeuq muenghgouz, cijaeu doiq gij hong raeuz miz leih, doiq saedhengz cwngcwz fazgveih miz leih, ndaej hawj vunzlai cauxfuk, raeuz couh gaenxgoemx bae guh.