庆乐小学：师生比赛读壮文

Vujmingz Yen Gingloz Siujyoz dwg gih raeuz Cuengh Gun song saw vah sawqniemh hagdangz ndawde aen ndeu, daj 1981 nienz hwnj, hagdangz couh guh Cuengh Gun song saw vah sonhag lo. Ginggvaq 30 lai bi roengzrengz guhhong, seizneix Gingloz Siujyoz gaenq dwg gij hagdangz guh hong Cuengh Gun song saw vah sonhag seizgan ceiq raez ndawde aen ndeu, dwg aen hagdangz guh Cuengh Gun song saw vah sonhag aeundaej cingzcik maenhndei ndeu.

Bineix 5 nyied 20 hauh, hagdangz gawjbanh lauxsae hagseng doeg govwnz Sawcuengh doxdax hozdung, gyoengq lauxsae Sawcuengh caeuq hagseng bouxboux cungj angq dangqmaz, haengjheiq camgya doxdax, ndaw hagdangz nauhyied dangqmaz.

Doxdax ngoenzde, mboujlwnh dwg lauxsae roxnaeuz hagseng, gyoengqde youq gwnz daiz doeg saw, simcingz gikdoengh dangqmaz, singyaem yaep sang yaep daemq, yaep vaiq yaep menh, gamjcingz caenliklik. Baez doxdax neix, ndaej daezsang le lauxsae Sawcuengh caeuq hagseng doeg Sawcuengh suijbingz.（Cinz Cicungh）