□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Gvangh Yenz naeuz:“Mbangj huqdoj bonjdieg conzdungj haenx hainduj okyienh lo, hoeng mbouj gaeuq lai.”

Vangz Gwzginz naeuz:“Gij huqdoj conzdungj yungh haeuxgwn daeuj guh caizliuh cujyau haenx, yaek ndaej dauqfuk lij yaek aeu byaij duenh seizgan ndeu.”

Veiz Gozcingh naeuz: “Swnghcanj ndaej fazcanj caeuq gwndaenj vunzlai ndaej gaijndei le, raeuz lij aeu haeujsim hawj gij huqdoj conzdungj bonjdieg ndaej guh dauq hwnjdaeuj.”

Gyoengqde lij bae ngonz le Laeuzhung Bakhuq. Gizneix dwg aen dieg cungqgyang cawx huq Namzningz, doxgaiq ngoenzyungh, binjcungj caezcienz, vunz siengj cawx doxgaiq ngoenzyungh nei, cungj daeuj gizneix yawjyawj gonq.

Aen Laeuzhung Bakhuq youq laj ndwencieng, vunz lai vunz ndaet, bouxgaihuq nyaengqnyatnyat mbouj ndaej dingzfwngz, yienh ndaej gig hwngvuengh.

Gij vunzgaemhong laeuzhung gyoeblwnh hawj Veiz Gozcingh naeuz, seizneix gwnz gyaqhuq daihgaiq baij miz fanh cungj huq, dingzlai dwg daj diegrog aeu daeuj, ndawde daj Sanghaij aeu daeuj ceiq lai, gij huq Guengjsae gag ok haenx caemh ciemhciemh demlai, mbouj noix gvandouz、dangzswz、doxgaiq gang、bingzbaujraeuj、haizgyauh、siujvujginh caeuq buhveihswngh daengj doxgaiq faiq daemj, cungj dwg swcigih gag ok.

Veiz Gozcingh naeuz:“Raeuz aeu gyavaiq fazcanj gij ginghgunghyez Guengjsae, ceng youq 10 bi baedauq guh baenz gag baengh bonjfaenh gihbwnj gung caez doxgaiq ngoenz- yungh.”

Yenz Gvanghcaij naeuz:“Guh ndei bae cungj dwg miz hojnaengz, geij bi neix daj Sanghaij senj daeuj buet cangj neix, cix dem le haujlai huq moq hawj Guengjsae.”

(caengz sat)