□ Ganh Sozvwnz/甘说文

Haemq gyae couh nyouq raen heiq valanz homfwtfwt, raq dem raq.

Baihnaj bakdou suzse hagseng, song go faexvalanz hunghanghang sangngaungau, lumj song faj liengj- hung cengj hai nei caemrwgrwg gang dwk. Gwnz gofaex, valanz lumj ndaundeiq nei haurobrob deih- yaenyaen, miz dujdup miz dujhai. Miz haujlai va gaenq hai nanz, valimq gaenq hai ndaej enj gvaq laeng bae. Seiz mbouj seiz couh miz limqva loenq roengzdaeuj, mbouj sing mbouj yiengj, lumj duzmbaj lumj biengzbeih, yaemzyaemz mbin roengzdaeuj, douh gwnz namh bae. Gwnz namh gaenq bu caengz valimq vasim ndeu, caij hwnj bae unqnepnep.

Rumzhwnz ci daeuj, vuenrubrub, hawj vunz simsangj.

Bouxlawz gangj doenghgo mbouj rox simsaeh vunz? Haemhneix, govalanz couh gig roxsoq, mbouj ak mbouj manz, mbouj cauz mbouj nauh, caemrwgrwg, lumj gyoengq hagseng iq dingqvah nei caj gou daeuj cunzyawj.

Aen haggeiz neix, hagdangz cek gyoeb guhdoih, gwnz mbanj sam aen gyauyozdenj seiq nienzgaep doxhwnj cungj gyoeb daeuj gizneix guhdoih hwnjdangz lo, hagdangz hix hainduj louz hagseng youq ndaw hagdangz youq lo.

Lwgnyez ngamq lizhai ranz daeuj hagdangz youq, cungj youq mbouj gvenq, cungj siengj ndaw ranz. Caiq gyahwnj nienzgeij lij oiq, gag gwnninz dajleix hix caengz rox geijlai. Ndigah, daj haihag daeuj, dou lauxsae cawzbae aeu hwnjdangz, lij lumj bohmeh gyoengqde nei, son gyoengqde bu mbonq dajsaeg, coi gwn coi ninz ……

Song ngoenz neix, ban gou saisai mbwkmbwk gak boux hagseng gaenq ngamq hag rox dajsaeg caeuq laengh buhvaq, gwnninz guh ndaej hix ndei di.

Hoeng, gou sim lij caengz dingh, haemhbonz youh miz cingzgvang fatseng lo.

Haemhbonz gou daeuj suzse cunzyawj, mingzmingz raen mbouj miz gijmaz vwndiz lo, couh heuh gyoengqde ndaep daeng ninz. Mbouj- liuh, mbouj geijlai nanz, gou lij youq rog suzse caengz lizhai ne, daengx aen suzse lwgmbwk cungj daejhwhw hwnjdaeuj. Caen geizheih ha, hwk ndaej gou doeksaetyat. Gou sikhaek ganj gvaq bae, baez cam, dah ndeu naeuz de siengj baema nem daxmeh, dah ndeu gangj siengj baema caeuq daxbuz……dahdah cungj gangj siengj ndaw ranz lo. Yienzlaiz dwg aenvih dah ndeu daej, lingh dah gaen daej, yinx ndaej daihgya cungj daej hwnjdaeuj. Hai, caen dwg lwgnyez ha! Vahsug gangj:“Ngaiz nem leq, lwg nem meh.” Di ndeu mbouj loek, lwgnyez liz mbouj hai bohmeh. Gyoengq lwgnyez neix caen siengj ranz lo! Hagseng daiq iq lo, gou sim inriri. Gou cijndei sing unq nai gyoengqde, gujli gyoengqde aeu daj iq hag rox gag youq gag guenjleix swhgeij, aeu giengiengz maenh’ak. Caj gyoengqde simdingh ninz ndaek le, gou cij baema.

Ngoenzneix banringz roengz- dangz le, gou cingq caeuq gyoengq hagseng gangjgoj. Miz song dah lai hung di naeuz: “Lauxsae, mwngz banhaemh aeu daeuj ndaw suzse dou bw, ndaw suzse lij miz vunz daej.”Cam dwg bouxlawz vih gijmaz caegndot daej, gyoengqde youh mbouj gangj, cij naeuz：“Fanjcingq ndaw suzse lij miz vunz daej, daengz haemh mwngz daeuj ndaw suzse couh rox lo.”Lau gou mbouj saenq, lij gangj:“Daengz haemh haengjdingh miz vunz daej.”“Mwngz itdingh aeu daeuj bw.”

Hwhw, haemh lawz gou youh mbouj bae suzse cunzyawj gyoengqde ne? Haemh mbouj bae cunzyawj song sam baez, gou ninz ndaej ndaek ma? Mbouj rox gyoengq dah fangz neix aeu gauj gijmaz!

Caen caem ha, caem ndaej mbouj miz saek sing gangj saek sing riu, engq mbouj miz saek sing cauz yiengj; caen cingx ha, cingx ndaej limq valanz doek youq gwnz namh hix dingq ndaej nyi sing yiengj.

Ngoenznaengz, banhaemh caengz ninz, gyoengqde cungj cici caca cauz lumj rongzroeglaej nei. Haemhneix vihmaz yienghneix caem? Aen bakdou suzse hai byaengqmyang, daeng ronghmyan ciuq okdaeuj.

“Gyoengqde mbouj miz gijmaz saeh ba?” Gou gaenjgip ganj gvaqbae.

Daengz rog bakdou, dingqnyi dah ndeu singdaemq gangj:“Lauxsae daeuj lo.” Gou sim engq gip lo, gyavaiq yamqdin.

Baez yamq haeuj suzse, sawq- mwh, miz gijmaz doxgaiq baenz raq baenz raq daj gwnzsang rim gyaeuj rim naj vanq roengzdaeuj, geij boux dahsau angq hemq:“Ngoenzciet vaiqvued!”“Lauxsae, ngoenzciet vaiqvued!” Lij riu gekgek hwnjdaeuj.

Aen suzse nauhnyied lo, youh lumj rongzroeglaej nei lo.

Gou maezmwd lo, yawj gij ceij mwnh haj nganz roek saek lumj naeva nei vanq roengzdaeuj, mbinyaeng- yaeng, ndongq mbyanmyan, yaep- mebmeb, gamjdaengz lumj bungz dahsien vanq va, lumj denhsij vanqsoengq laex.

Gou aen’uk maezmaez mwnh- mwnh, aensim hwnjhwnj roengzroengz, aenndang yaek fouz yaek mbin.

Gyoengq lwgnyez angq dwk cici caca, liz gou geijlai gyawj ha, yawj ndaej geijlai cingcuj ha. Gyoengqde lij ndenq dujva hawj gou, lij miz mingzsinben gyaemqgyigyi rangfwtfwt.

O, aensim deng hwk ndaej diuq caengz gvaq, vihmaz youh sikhaek hai lumj va, diemz lumj gwn dangz ne?

Gou doq han gyoengqde, doq ciep dawz gij mingzsinben. Gwnz mingzsinben sij gijmaz, gou gaenbonj yawj mbouj gib. Gou cij nyouq raen raq heiq homfwtfwt ndeu, lumj heiq valanz nei.

O, daengx benq hoengheiq cungj homfwtfwt, dwg heiqhom valanz.

O, gou cadi lumz lo, ngoenzneix dwg cietlauxsae!

Hwhw, raeuz lauxsae lumz ngoenzciet swhgeij le miz gijmaz youqgaenj ne? Miz hagseng geiq ndaej couh gig ndei ha!

Gyoengq lauxsae, ngoenzciet vaiqvued!