Daj bineix daeuj, Cungzcoj Si gak gaep bumwnz yawjnaek hong vah saw saujsu minzcuz, doihaeuj vwnzva minzcuz fazcanj.

It dwg haenqrengz guh gvangjbo yingjsi Vahcuengh. Bineix, Ningz- mingz Yen Densidaiz laebdaeb haibo cezmuz《Sinhvwnz Vahcuengh》, Bingzsiengz Si Densidaiz youh youq 6 nyied 23 hauh haibo cezmuz《Sinhvwnz Vahcuengh》. Youq guh gvangjbo fuengmienh, Ningzmingz Yen、Denhdwngj Yen moix ngoenz haibo lanzmuz《Sinhvwnz Vahcuengh》, Bingzsiengz Si hix youq 6 nyied 3 hauh hai bo, Lungzcouh Yen couh yaek haibo lo. Dangqnaj gaenq lozsiz cienzngaenz 5 fanh maenz.

Ngeih dwg gyarengz guh hong youq sevei yungh Sawcuengh sij baiz、gvangjgau rogranz daengj. Dangqnaj, daengx si guekgya gihgvanh、saehnieb danhvei gij cih gwnz baiz cungj aeu Cuengh Gun song cungj saw sij; gij gvangjgau rogranz、byauhci roen、baizroen daengj hix cungj aeu Cuengh Gun song saw sij. Linghvaih, daengx si minzyij hidungj dawz 6000 aen diegmingz ndaw saw《Yawj Caez Vwnzva Cungzcoj》fanhoiz baenz Sawcuengh.

Sam dwg cizgiz banh eu fwen doxdax, gyagiengz Vahcuengh fuzvu gunghnwngz. 4 nyied 9 hauh, si minzveij、vwnzvagiz lienzhab gawj- banh cietbofwen Bouxcuengh eu fwen doxdax; gak yienh(si、gih) hix cungfaen leihyungh“Sam Nyied Sam”、 cietbofwen conzdungj nem cietgingq hozdung, gawjbanh eu fwen doxdax, senhconz fuengcim cwngcwz dangj nem guekgya, hawj saedceij vunzlai fungfouq.

Seiq dwg haibanh Cuengh Gun song vah saw sawqdiemj siujyoz nem ban maij hag Sawcuengh. Dangqnaj, Cungzcoj Si banh Cuengh Gun song vah saw siujyoz sawqdiemj yozyau 4 aen, caemhcaiq youq Lungzcouh Yen Minzcuz Cunghyoz、Denhdwngj Yen Minzcuz Siujyoz hai ban maij hag Sawcuengh, cujyau son hagseng hag singmeh、yinhmeh、singdiuh Sawcuengh nem go Vahcuengh.

(Dwng Haijcouh)