Ngoenzhaenx lajbyonghngoenz dangz meijsuz, gyoengq doengzhag gak boux gag mbon daeh dawz aen gingq iq ndeu okdaeuj. Neix dwg sizsiz lauxsae ngamq daeuj moq ngoenz- lwenz gaenq anbaiz ndei lo, gyoengq doengzhag lij caengz rox daiq gingq daeuj yaek guh gijmaz.

Lingz hwnjdangz yiengj le, sizsiz lauxsae doiq daihgya naeuz:“Ngoenzneix gyoengq doengzhag ciuq gingq gag veh swhgeij, haeujsim, aeu gaemdawz gij daegdiemj swhgeij daeuj veh o.” O! Laxlawz daiq gingq daeuj couh dwg ciuq gingq veh swhgeij, caen singjsien ha!

Gou bingzseiz youq ranz gig siuj ciuq gingq, ngoenzneix naj doiq aengingq, gou cij nyinhnyinh caencaen ndomqyawj swhgeij mbat ndeu; fouq lwgda iq lumj daxboh nei; aenndaeng hix iqet, hoeng lij suenq bonghsoh. Aenbak loq dit hwnj, naengbak ndingndet gig ndeiyawj, daegbied dwg song mbiengj gemj miz song aen cenjlaeuj, baez riu seiz, couh mboep haeujbae baenz song aen“congh”, lumjbaenz caen cang ndaej haujlai laeuj nei. Diuz riengmbengq gou seizbienh cug, cienz dwg baengh geij diuz caijsaek gyauhguh daeuj cang lengj.

Doiq coh aengingq, gou veh gij daegdiemj neix roengz gwnz ceij bae. Veh ndei le caiq sijsaeq ndomqyawj, hix caen lumj swhgeij dahraix bw.

(Sauhingh Yen Sizyen Siujyoz Cenz Swhdenz)