□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Yawj boux vunzmbanj neix lumj boux vunz lauxsaed ndeu. Veiz Gozcingh cix simsoh han de: “Gou mbouj cawx, cij siengj camcam hangzcingz.”

Daj hangz gaeqbit byaij okdaeuj, Vangz Gwzginz naeuz:“Mwh ceiq haemzhoj seizde, duzgaeq gaen gai 8 maenz, cawx duz aeu geij cib maenz, sojyij miz di ganbu damzbyoedbyoed naeuz, gou dwg boux ganbu duzgaeq ndeu.”

Veiz Gozcingh naeuz:“Vunz baihbaek gvaq cieng gwn gyaujswj, mboujnex mbouj lumj gvaq cieng, vunz baihnamz ne, yaek gaj gaeq, mboujnex caemh mbouj lumj gvaq cieng. Bineix gou guj daih dingzlai vunz cungj ndaej gaj gaeq gvaq cieng luba!

Yenz Gvanghcaij naeuz:“Ciuq dingz gyaq neix, gij ganbu caeuq vunzyouq Namzningz, ndaej gaj gaeq gvaq cieng wnggai mbouj miz vwndiz.”

Youq hangzbyaek vunz engqgya hoengh, nauhyied dangqmaz. Gij diemqbyaek guekguh caeuq gij danbyaek doxgapguh haenx doi doh daihbaj byaekbau、byaekgaiqlanzhup caeuq lauxbaeg, lij miz haujlai danbyaek seivunz geq cungj geq mbouj caez, baij miz makyungz、lwgheuj、byaekohswnj、ho、byaekginz- caiqhom daengj gak cungj byaek, gyaqcienz mingzyienj roengzdaemq. Vunz cij yungh maenz geij gak ngaenz, cix cawx ndaej baenz swx byaek.

Veiz Gozcingh naeuz: “Swnghcanj hwnjbae le, doxgaiq cix lai hwnjdaeuj, gyaqcienz cix bienz- ngeih lo.”

Gvangh Yenz naeuz:“Vunzlai doiq yiengh gunghawj byaek seizneix haemq habhoz.”

Gyoengqde daj Hangzbyaek Hozbingz okdaeuj le, youh cienj haeuj Gaisinhvaz bae, gij diemqhuqcab lohgvaq ndaej raen haenx, ndawde cungj baij miz gak cungj dangzlwg- doem、dangzlwgraz、dangzmak、ceiz- haibak、mienhbau gaudiemj caeuq faenjsei、raetnae、raetmoegngaex、byahamz daengj huqhawq huqcab, gig lai vunz daeuj cawx huq.

(caengz sat)