□ 甘说文 / 石才以

Youz Byayizfungh Liujcouh

Dieg Cuengh bya lai ndoi deih, gak goengq cungj mbouj doxdoengz. Diegcuengh dah lai rij deih, gak diuz cungj mbouj ityiengh……Sujgyaj ndaej hoengq, dou song gyaeujyah gietdingh bae youz gij bya mizmingz Mbanjcuengh haenx, gamjsouh gij gingjsaek gyaeundei dieg Cuengh raeuz.

柳州鱼峰山游

Bineix ndwen 7 ngoenz 6 hauh, singgeiz roek, fwn gvaq mbwn gvengq, dou song gyaeujyah daeuj daengz Byayizfungh youz.

Byayizfungh youq ndaw singz Liujcouh, sang miz 80 lai mij, yiengh lumj duz byaleix ndeu daengj dwk ityiengh. Laj dinbya miz aen daemz iq he, heuhguh Siujlungzdanz.

Cienzgangj Liuz Samcej dwg youq gizneix eu fwen baenz dahsien. Doeklaeng, vunzlai dawz giz ndei guhcaemz neix guh baenz aen gunghyenz he, heuhguh Yizfungh Gunghyenz.

Seizneix, Byayizfungh miz mbaeklae iet daengz dingjbya bae. Raeuz gaen mbaeklae benz hwnjbae, couh benz ndaej daengz dingjbya lo. Ndwn youq gwnz dingjbya, muenghyawj seiq mienh, aen singz Liujcouh gvangqlanghlangh, gij gingjsaek de raeuz cungj yawj ndaej caez liux.

Baihdoengnamz laj dinbya dwg daemz Siujlungzdanz, aen daemz neix mbouj gvangq, gij raemx sawndikndik youh liengzsisi. Aen daemz Siujlungz- danz caeuq dah Liujgyangh doxdoeng, raemxdah hwnj raemxdaemz hix lai, dah mboek daemz cix mboek.

Gek aen daemz Siujlungzdanz yawj goengq Byayizfungh, goengq bya neix couh lumj duz byaleix ndeu diuq ok raemx ityiengh. Gwnz bya gij gofaex haenx seiqgeiq cungj heuswdswd, ndaw daemz gij raemx haenx doenghbi cungj sawndikndik. Gizneix faex heu raemx saw, gingjsaek ndeiyawj raixcaix.

Byayizfungh miz aen goj he gig mizmingz: Cienzgangj canghfwen Bouxcuengh Liuz Samcej daeuj gizneix son beixnuengx eu fwen, youq gizneix caeuq doihndei doiq fwen. Doeklaeng, Samcej youq gizneix bienqbaenz dahsien lo.

Youz Dahyagenj Yizcouh

宜州下砚河游

Caeux couh dingqnyi baengzyoux naeuz Dahyagenj Yizcouh gyaeundei baenzmaz, yienghneix, youz Byayizfungh Liujcouh le, 7 nyied 7 hauh, dou song gyaeujyah youh ganj ci bae daengz Yizcouh Si，bae youz Dahyagenj.

Dahyagenj youq baihbaek singz Yizcouh, duenh dah neix miz 12 goengleix raez, raemxdah sawndikndik, yawj ndaej raen daej bae.

Haenzdah bangxdat miz gaiq rinbenj lumj diuz faexhanz, miz gaiq rinbenj lumj mbaw sujbaq, cienzgangj dwg faexhanz caeuq sujbaq gosien Liuz Samcej. Bangxdat miz aen daiz doiqfwen, daj gizneix doxhwnj bae Swnggujlungz, song haenz goengqbya doxdab, go’ndoek duengh fuemx. Daj gizneix doxroengz bae daengz bakdah Dahliujgyangh, song haenz go’ndoek gungj hwet doxcoux, sing fwen goksak, gak aen gingjdenj cungj miz gij gojgeq gosien: Daizcienzfwen、Faexdingh- cingz、Rinsoujbaq、Rinmuenghnuengx daengj.

Dahyagenj raemx gvangqlangh, ndaw dah miz gaiq dieg youh bingz youh raez ndeu, baihgwnz rin’gyaeq henjgim ndongqmyanmyan, bouxyouz haengj cauh saz vad ruz bae guhcaemz. Daj Giuzyagenj caiq doxhwnj 200 mij, raemx roenx gvaq fai, lumj raemxdiuqdan nei, ndeiyawj raixcaix.

Funghgingj Dahyagenj mbouj- danh raemx saw、faex heu、gamj gvaiq、bya geiz, lij gizgiz sawj vunz siengj- daengz gosien Liuz Samcej.

Mbanjliuzhoz、Mbanjmozfuj、Miuhsamcej、Ranzsamcej、Ranz- ahniuz daengj doengh aen gingjdenj henzdah neix, aenaen cungj miz gojgaeq Liuz Samcej.

Dahyagenj ndeiyawj youh ndei guhcaemz, bouxyouz yawj gvaq gak dieg gingj le, lij ndaej camgya haujlai yiengh guh’angq dem, lumj daemj- gyaeq、doiqfwen daengj.

Youz Byafungh Vujmingz

武鸣凤凰山游

7 nyied 20 hauh, mbwn gvengq- neuneu, song gvanbaz dou bae Vujmingz youz Byafungh.

Byafungh youh heuhguh Byagij- fung, youq Vujmingz Yen Cwngzdungh Cin, liz yienhsingz 7 goengleix gyae. Dahyanghsanh daj laj dinbya heux gvaqbae, henzgyawj lij miz Byaswh- ling、Miuh Gvangjdwz Gunghcuj.

Byafungh seiqlengq gvangqbingz, song goengq dingjbya daengj dwk, caen lumj duzfungh ndiengq din yaek mbin ityiengh. Byafungh gofaex gogaeu heuswdswd, baihgwnz gofaex geq sangngaungau, baihlaj gogaeu laux raezrangrang, gofaex yinx gogaeu maj, gogaeu heux gofaex iet.

Byafungh gamj lai miuh hix lai, dingjbya miz gamj, dinbya miz miuh, miz gamj couh miz miuh, raen miuh couh raen gamj. Daengx bya rin daengj rin ngamh gizgiz cungj miz, daj ciuhgeq roengzdaeuj, haujlai vunz youq gizneix raiz saw daez sei.

Goengq dingjbya baihdoeng, miz aen gamj ndeu heuhguh Gamjdoegsaw, bangxdat gaek miz Sawgun “Cauzyangz Mingzfung” seiq aen cih hung. Youh miz aen gamj he heuhguh Gamjdaigiz, ndaw gamj gaek miz Sawgun “fung” aen cih hung ndeu, aen cih “fung” neix youq Gvangjsih raeuz, dwg aen cih gaek gwnz rin ceiq hung ndeu.

Goengq dingjbya baihsae, miz Gamjhozyinz. Gizneix rin bingz gamj gvangq, cih laux sei geq gig lai. Diuz Dahyanghsanh couh daj dinbya mbiengjneix heux gvaqbae.

Benz hwnj dingjbya Byafungh, yiengq seiqlengq muenghyawj: Naz bingz reih gvangq, dah gaeuz loh soh, mbanj gyaeu haw lengj, ranzmbanj geijlai gyaeundei ha!