□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Gangjriu sat le, Veiz Gozcingh cienj haeuj cingqdaez naeuz: “Gou siengj ngoenzsinghgiz bae ngonzngonz gij hawciengz mwh yaek gvaq cieng haenx, mbouj rox sou haengj mbouj haengj bw?”

Yenz Gvanghcaij naeuz: “Gozcingh dungzci bae yawj hawciengz Namzningz, dou gouz cungj nanz ndaej seizndei neix bw!”

Vangz Gwzginz naeuz: “Haengj!”

Gvangh Yenz naeuz: “Gou daeuj yinxloh!”

Lienzdaemh geij ngoenz neix, Namzningz cungj dwg mbwn bumz doek fwn, ngoenzneix banhaet mbwn fwt baenz rongh, daengngoenz lij lohnaj okdaeuj yaep ndeu, mbwn ciemhciemh bienq raeuj dauq.

Veiz Gozcingh daengj vunz youq diuz Roenhinghningz byaij dwk, yawj raen ndaw diemqbouq baij doh gak cungj gak yiengh huq, vunzlai ne bouxboux vuenvuen heijheij genj gij doxgaiq gvaq cieng yungh haenx dwk. Veiz Gozcingh angq naeuz: “Yawj gij yiengh neix, bineix vunzlai yaek ndaej gvaq aen cieng lai habhoz lo!”

Gyoengqde byaij daengz Hangz- byaek Hozbingz, gizneix nauhyied raixcaix, vunz lai vunz hoengh.

Youq gwnz dan gai noh, baij doh nohmou singjsien. Miz mbangj mou lauz baenz conq na, geij boux vunzcawxhuq youq baihde haenh- naeuz:“Duzmou ciengx ndaej baenz- neix biz, mbouj ngaih bw, cawx di ndeu baema ranz cien youz gig ndei!” Caemh miz mbangj dan gai nohyiengz nohvaiz.

Hangz gai gaeqbit, roengqgaeq roengqbit baizledled, haemq lai vunz youq neix gaemh gaeq, gangj gyaq.

Veiz Gozcingh doq yawj doq cam. Miz boux vunzmbanj souj dwk baenz roengq gaeq, Veiz Gozcingh cam de: “Gij gaeq neix dwg buenq ndaej roxnaeuz ciengx ndaej ha?”

“Gag ciengx ndaej. Bineix gag ciengx ndaej baenz roengq gaeq, gaemh geij duz okdaeuj gai, vuenh di nienzhuq baema.”

“Geijlai cienz gaen?”

“Aeu caez ne, gaen maenz haj. Dungzci, duzgaeq duzduz ndei, gungh miz 4 duz, mwngz cawx caez bae vei!”

(caengz sat)