Daegciz Mbanjlaj yaek 30 bi lo, lij caengz aeu ndaej yah. Miz ngoenz ndeu, baengzyoux ndei de Daegbauj doiq de naeuz: “Bajseiq Mbanjmbwk guhyaz ndaej gig lingz, vunzmbanj cungj heuh de Yahsien. Miz mbat ndeu, gou bae heuh de suenqmingh, gou gip ndaej 800 maenz ngaenz, de hix suenq ndaej ok. Mwngz bae heuh de suenq mbat ndeu, lau caen aeu ndaej yah gyaeundei ma bw.”

Daegciz haen lwgda naeuz: “Caen dahraix?”

“Gou yaeuh mwngz guhmaz, saenq mbouj saenq youz mwngz lo.” Daegbauj naeuz.

Ngoenz daihngeih, Daegciz caen bae Mbanjmbwk cam yaz dahraix. De bae daengz ranz Bajseiq, raen ndaw ranz venj miz siengqyou, diemj yieng diemj lab. Bajseiq boux yahsien neix raen Daegciz daeuj daengz, naj riunyumjnyumj, de cimyawj Daegciz yaep ndeu, cam rox betcih ngoenzseng Daegciz le, couh heuh Daegciz cang ndei yieng, couh daenhdaenh song ga nam yaep ndeu, naeuz: “Mwngz mbouj geng reihnaz, hoeng ndaw daeh ngaenzceij na bw. Mwngz caengz aeu ndaej yah, danhseih, vaenyin mwngz ndei, ndwen laj itdingh aeu ndaej yah.”

“Deng, deng, deng, saeh neix couh cingj mehbaj mwngz bang gou, gou caeux couh siengj aeu yah lo.” Daegciz angqvauvau naeuz.

“Ndei ha, aeu ndaej yah le, gaej lumz cingz gou bw. ” Bajseiq riu naeuz.

Daegciz ngaekngaek gyaeuj naeuz: “Lumz mbouj ndaej, lumz mbouj ndaej.”

Bajseiq ciep dwk naeuz: “Bineix vaenyin mwngz daengz lo. Yienghneix ba, ngoenz sam nyied sam, mwngz bae Suenva eu fwen gouz youx, bau mwngz aeu ndaej dahsau gyaeundei ma, mbouj yungh aeu vunz guhmoiz……”

Daengz ngoenz sam nyied sam, Daegciz cang ndang ndaej ndeindoep, byoemgyaeuj roi ndaej wenjnemnem, naengh nengznyaen douh hix aeu daengjranj. Daegciz bae daengz Suenva, yo, vadauz vacwx hoengzfwdfwd, seiqcawq va hom roeg heuh, rumzcin cififi. Gij vunz daeuj youz haenx baenz sueng baenz doiq, miz gangj miz riu. Miz haujlai sau mbauq dawz va eu fwenz gouz youx. Daegciz raen yienghneix, sim gig angq, de menh byaij menh yawj, menh boih hotfwen Bajseiq ngoenzhaenx son hawj de haenx. Dumding, Daegciz raen laj goliux henzdaemz miz dahsau gyaeundei ndeu naengh dwk, cim ndaw daemz, gwnzmengq de cab miz song duj vadauz. Daegciz byaij gvaqbae cim de, yawj ndaej dahde naj hoengzfwdfwd. Daegciz lau geiq mbouj sug hotfwen haenx, youh aeu soujgih okdaeuj yawj hot fwen yaep ndeu, liux le coh dahsau eu naeuz: “Naj hau naj youh maeq, gwj naeq sim gwj feih, cam nuengx geijlai bei(bi), boiq mbauqndei bae caengz?”

Dah haenx naj hoengz lumj gaeqhangh goegndet neix, cix eu fwen dap naeuz:“Gou vunz Mbanjdangz- meix, bineix ngeihcib haj, bouxdog cwxcaih gvaq, caengz bae haq daeg lawz.”

Daegciz dingq le, sim angq dangqmaz, riu dwk cam naeuz: “Mwngz heuhguh Suh Vah?”

“Gaej luenh heuh lai, gou heuhguh Suh Meijvah……” Dahsau dap naeuz.

“O, doiq mbouj ndaej, gou luenh heuh lo, mwngz gig gyaeundei, caen dwg ‘mizyienz cienleix daeuj doxgyaez’ bw……” Daegciz naj riunyumj naeuz. Songde angq lumj duzlingz gip ndaej mak nei, youq ndaw Suenva caez youz caez gangj caez riu, caez naengh guhangq eu fwen, lumjbaenz gig caeux couh roxnaj lo.

Daengz ndwen seiq, Daegciz caeuq Suh Meijvah giet baenz gyaeujyah lo, songde doxgyaez doxndiep, saedceij gvaq ndaej van lumj dangz.

Daegciz mbouj lumz gij vah Bajseiq gvaq. Miz ngoenz ndeu, Daegciz cawx ndaej haujlai huq ndei, daiq mehyah bae docih Bajseiq yahsien neix. Song gvanbaz daeuj daengz Mbanjmbwk, cam liux haujlai nanz, cungj mbouj raen naj Bajseiq. Miz vunz lwnh songde nyi, naeuz Bajseiq buen bae Guengjdoeng riengz lwg youq lo. Daegciz gvanbaz youh bae Guengj- doeng ra, gig mbouj yungzheih cij ra ndaej raen Bajseiq.

Youq ranz Bajseiq, Bajseiq riu naeuz: “Daegciz ha, gou baenzlawz rox suenqmingh, ngoenzgonq Suh Meijvah daeuj ranz gou, naeuz gou bang de gienh saeh hung ndeu, ngoenzlaeng mwngz hix daeuj ranz gou, gou raen song boux sou gig doxngamj, gou couh maeuzhab songsou, gou aeu soujgih heuh sou baenzlawz guh, son sou baenzlawz guh fwen, haha, aen fap neix lingz ba? ”

Daegciz song gvanbaz hix riuhaha hwnjdaeuj.

“Daegbauj gip ndaej 800 maenz ngaenz dwg saeh maz?” Daegciz geizheih dwk cam Bajseiq.

“Daegbauj mboengqneix bae nem saehdoj, yah de lau de loemq ndaw gumzdoj bae, heuh gou cangguh bang Daegbauj suenqmingh, naeuz mingh de bineix mbouj daiqcienz, vihliux hawj Daegbauj saenq gou suenqmingh ndaej cinj, yah de dawz 800 maenz ngaenz cuengq youq gwnz loh, cang hawj Daegbauj bae gip, doeklaeng yah de couh dwk dienhvah naeuz gou nyi. Ndigah, sou couh naeuz gou suenq- mingh ndaej cinj ndaej lingz.” Bajseiq gangj le cij danq gaemz heiq ndeu.

“Yahsien、goengdauh cungj dwg yaeuh vunz aeu cienz, raeuz gaej bae saenq gyoengqde.”Bajseiq coenz naek cingz laeg naeuz.

Yaek dauqbae seiz, Daegciz cix riuhaha naeuz: “Bajseiq, dou mbouj saenq yahsien, dou cij saenq mwngz, haha!”

Ndaw ranz Bajseiq rwenz daeuj sing riu goksasa.

□ Hoz Cunghliuj/何宗柳