Cangh Hwngz maj ndaej mbaq gvangq ndang langh, dwg boux vunz sangmaengh ndeu, aen ndangdaej neix ngamjhab guh faenh hong hai huqci buet roen’gyae de; de beizheiq gaenj, bak raeh ak gangjvah, neix hawj gyoengq vunz youq gwnz roen dajgiep haenx miz di dwglau. Gyonj daeuj gangj, yienghsiengq de sawj vunz “gingqgyaez youh lau raen ”.

“Ngaizromh cawj baenz caengz?” Cangh Hwngz doq hwnqcongz doq cam mehyah youq ndaw ranzdajcawj haenx.

“Caengz.” Mehyah naeuz.

“Haemhlwenz gou mbouj dwg caeuq mwngz gangj, haetneix gou yaek okci caeux ha, mbouj dawz vah gou haeuj rwz ha?” Cangh Hwngz hat naeuz.

Cangh Hwngz seiqcib bi lo, gig noix guh hongranz. Hix mbouj ndaej gvaiq de mbouj guh, ranz de saedceij gvaq ndaej yienghneix ndei, dwg baengh de hai ci buet gwnz buet laj canh ndaej cienz.

Cat heuj swiq naj sat le, Cangh Hwngz couh roengz daengz laj laeuz bae caiq genjcaz aenci caeuq gij doxgaiq gwnz ci haemhlwenz cang ndei haenx mbat he, nyinhnaeuz gij huq caeuq aenci mbouj miz gijmaz saeh le, couh dauqma gwn ngaizromh. Yaek okdou seiz, de yaep mbat da ndeu coh mehyah, mehyah sikhaek buet bae daizsaenz diemj yieng, ndawsim caegcaeg naeuz: Goengcoj baujyouh gvan gou okci bingzan swnhleih.

Youq gwnz loh, Cangh Hwngz baenq aen fuengyiengbuenz, ciensim haeujeiq bae hai ci, fouq lwgda mbouj yaep dwk yawj baihnaj……mbouj rox gvaq le geijlai nanz, byaij daengz giz van ndeu, Cangh Hwngz guh aen dungcoz van gyaeundei ndeu, aen ci couh gig dingq vah dwk baenq gvaq giz van bae. Sawqmwh, Cangh Hwngz ndawsim “boeb” dwk diuq mbat ndeu, mbouj ndei, miz “maroen”. Haxbaenh aen dungcoz van haenx, de ienq dwk mbei yaek naeuh bae, hoeng ganj mbouj gib lo, baihnaj miz lucwngyenz cingq genjcaz. Seizneix danghnaeuz hai ci doxdauq ndoj gyoengde, gyoengqde haengjdingh gyaep gvaqdaeuj, yienghneix deng gaemhdawz saeh engq naek, Cangh Hwngz cijndei laebdaeb hai ci bae naj……

“Bingzciengz buet roen’gyae, hai ci soqlaiz mbouj gamj veizgveih gvaq, ngoenzneix buet roen’gyawj, laihnaeuz mbouj youqgaenj, haemhlwenz cang lai geij dun huq, hai! Cienzyouz ngoenz beij ngoenz bengz, mbouj cang lai di couh mbouj ndaej canh gijmaz lo.” Cangh Hwngz gag gangj gag naeuz.

“Cedmeh de, gyoengq ‘maroen’ neix, caen dwg goengloh sam luenh (luenh fad cienz、luenh sou ngaenz、 luenh lanz ci), rim aendaehngaenz swhgeij, gyoengq maseng neix, iek cienz lumj ma iek haex nei”. Cangh Hwngz haeb faenz maenj naeuz.

“Muengh cojcoeng baujyouh gou swnhleih gvaqbae……”Cangh Hwngz caegcaeg ngeix.

Aenci deng gaep dahraix lo. Cangh Hwngz baez saet roengz ci, naj riu ndaeng riu dwk ndenq ien hawj gyoengqde naeuz:“Cit ien gonq.”

“Docih, dou mbouj cit ien.”Boux lucwngyenz naeuz.

Cangh Hwngz youh naeuz:“Beixnuengx, gou mbouj famh saeh neix gvaq, neix dwg baez daih’it, mbouj caiq miz baezlaeng lo, sou yienzliengh gou mbat neix ba.”

Gyoengqde cij goq genjcaz, mbouj leixlangh Cangh Hwngz. Cangh Hwngz roxnyinh mbwnlaep liux, youh mboujfug yienghneix deng fadcienz, youh naeuz:“Beixnuengx, gou rox loek lo, sou hix aeu hawj beksingq miz gihvei gaijloek cij ndaej ni?”Cangh Hwngz gangj ndei gangj rwix cungj mbouj miz yungh, dayawj gyoengqde yaek sij fei fadcienz lo, Cangh Hwngz sikhaek naeuz:“Gou mbouj aeu fei, sou ciuqgoq gou baez ndeu ba.”

“Ciuq gvigawj banhsaeh.” Boux lucwngyenz ndeu naj haenq dwk naeuz:“Hai ci mbouj rox baujhoh goengloh, mbouj miz ancienz yisiz, dawz sengmingh dangq guhcaemz.” “Bya”sing ndeu, mbawfei deng sik lo, oet daengz ndaw fwngz Cangh Hwngz. Raen daengz neix, Cangh Hwngz da daengj bak aj, ndwn youq gizhaenx mbouj rox doengh din……

Yawj lucwngyenz mbouj miz di siengliengz, yawj mbawfei fadcienz ndaw fwngz, Cangh Hwngz ndatheiq fwdfwd hemq naeuz:“Gyoengq ‘maroen’sou, caen dwg luenh sou luenh fad, caeuq bouxgieploh miz maz mboujdoengz, mbouj miz saek di liengzsim, nap gwn lwedhanh beksingq, yienzlaiz sou dwg yiengh- neix fatcaiz.”

Cangh Hwngz naj nding rwz dik, ndaq dwk myaiz sinzbyoebbyoeb bae. Doiq gij yiengh Cangh Hwngz, gyoengq lucwngyenz mbouj gaenj mbouj gip, dang de dwg mabag raeuq ronghndwen, cix dinghdingh yawj de, Cangh Hwngz engqgya mbaetheiq, de doq ndaq doq hwnj ci bae, naengh ndei le, yiengq rog cuengci biq amq myaiz ndeu, naeuz:“Viz, baez huq neix mboujdanh beg rag, lij diep bonjcienz dem.”Gangj sat, gya youz bongh baenaj……

“Bung” sing ndeu, aenci Cangh Hwngz hai bae bak lai mij seiz, aen lunzdaih laeng dek lo, aenvih cang huq naek lai, aenci baez ngeng, fan youq gwnz loh.

Gyoengq lucwngyenz raen daengz gij ciengzmienh sawj vunz dungx mbuemq ndang saenz neix, bouxboux ngaez liux, sikhaek buet gvaqbae.

Cangh Hwngz deng gij saeh fwt fatseng neix haep ndaej hoenz mbouj youq ndang, de diemq gaemz heiq hung ndeu le, yawj swhgeij sieng mbouj naek, cij dwg deng fuengyiengbuenz caeuq aeneij gab dwk ning mbouj ndaej, couh namq naeuz:“Cedmeh de, boihseiz doek daengz ndang seiz gwn raemxsaw hix gaz hoz.”

“Sieng mbouj?”Gyoengq lucwng- yenz buet daengz, yousim dwk cam de.

“Mbouj mizmaz sieng naek, deng gab lo.” Cangh Hwngz siengj mbouj daengz gyoengqde buet daeuj baenz vaiq, doeksaet youh gikdoengh.

“Miz gangciem lw ? ”

“Miz, youq laj……” Cangh Hwngz gamjdoengh dwk yaek gangj mbouj ok vah.

“It ngeih sam, geuh——”

“It ngeih sam, geuh——”

……

Geuh geij baez, Cangh Hwngz dauqdaej ruenz okdaeuj lo, de unqbyeb lumj aengiuz mbouj miz heiq nei naengh youq gwnz namh : “Docih sou, haxbaenh gou……sou bouxhak mbouj gvaiq beksingq mbouj roxleix, cingj sou yienzliengh gou.” Cangh Hwngz najmong naeuz.

Yawj vunz sieng mbouj naek, boux lucwngyenz ndeu naeuz: “Caeklaiq mbouj haih deng bouxwnq hw! ”

“Gou neix dwg gag ra dai ha……” Cangh Hwngz danqheiq naeuz.

“Dam cienzcaiz, ra cainanh, ndaej noix vut lai ha…… Sou gangj ndaej deng, gou yawjsiuj ancienz, doeklaeng buen rin dub din swhgeij.” “Gizsaed, gou rox sou mbouj guenj seiz nit seiz ndat, seiz fwn seiz rumz, bae coih goengloh， dwg vih gij sengmingh caizcanj vunzlai ancienz, dwg vih hawj saedceij beksingq gvaq ndaej vuenyungz、 doxhuz onjdingh……” Ndaek bouxsai vifung neix，seizneix fouqda gamzrim raemxda lo.

“Bingzan dwg fuk!” Daihgya mbouj iek caez naeuz .

Lucwngyenz naj loh ok sai riu lo……