□ Vangz Yungzmenz/黄荣棉

Boux lwgsai ndeu, gaem maenz cienz ndeu, riengz gai cam vunz ndaw diemqhuq:“Mwngz gizneix miz goeng- mbwn gai lwi?” Mizmbangj boux diemqcawj naeuz mbouj miz, miz- mbangj ngeiz de dwg daeuj gyauxluenh, caengz gangj vah couh gyaep de ok diemq bae.

Mbwn yaek laep seiz, lwgsai bae daengz aen diemq daih ngeihcib gouj, diemqcawj mizsim ciepdaih de. Diemqcawj dwg boux vunzgeq loegcib lai bi, byoemgyaeuj hau, lwgda sienh, de riu dwk cam boux lwgsai:“Lwnh gou nyi, mwngz cawx goengmbwn guh maz ne?”Lwgsai raemxda lae dwk lwnh bouxgeq, de heuh Banghdiz, daxboh daxmeh gig caeux couh dai lo, dwg daxau ciengx de majhung. Daxau dwg boux guhranz ndeu, geij ngoenz gonq de daj gwnz gyaqranz doek roengzdaeuj, maez bae mbouj singj. Canghyw naeuz, cijmiz goengmbwn cij gouq ndaej de. Gou siengj, goengmbwn itdingh dwg yiengh doxgaiq gig geizheih ndeu, gou cawx goengmbwn dauqma, hawj daxau gwn le gij sieng de itdingh bienq ndei.

Goenglaux da nyinh lo, cam:“Mwngz miz geijlai cienz?”

“Miz maenz ndeu.”

“Lwgnyez, baihlaj gij gyaqcienz goengmbwn ngamj dwg maenz cienz ndeu.”Goenglaux ciep gvaq maenz cienzdih le, daj gwnzgyaq aeu bingz yinjliu heuhguh “goengmbwn cup de” ndeu hawj Banghdiz.“Dawz bae, daxau mwngz gwn bingz ‘goengmbwn’neix le couh mbouj miz saeh lo.” Goenglaux naeuz.

Banghdiz dawz bingzyinjliu umj youq ndaw rungj, angqvauvau dauqma yihyen, baez haeuj fuengzbingh, de couh heuh dwk:“Daxau, gou dawz goengmbwn cawx dauqma lo, bingh mwngz gig vaiq couh ndei lo!”

Gvaq le geij ngoenz, aen yihliuz siujcuj youz boux canghyw gwnz seiqgyaiq ceiq okmingz gyoebbaenz ndeu daeuj daengz ndaw yihyen, bang daxau lwgsai yawjbingh, gyoengqde yungh gisuz ceiq senhcin haenx daeuj ywbingh, sieng daxau Banghdiz gig vaiq couh ndei lo.

Okyen seiz, daxau yawjraen cienzyw gig lai, yaek maez gvaqbae, yihyen naeuz de nyi, cienzyw gaenq miz boux laux ndeu bang de ok lo. Boux laux haenx dwg boux mizcienz ndeu, de nyuenz dwg boux dungj- swcangj aen gunghswh hamjguek ndeu, duiyouh le daeuj gizneix youq, hai aen diemqgaihuq ndeu, cwxcaih gvaq saedceij. Aen yihliuz siujcuj couhdwg de yungh cienz cingj daeuj.

Daxau gamjdoengh raixcaix, de sikhaek caeuq Banghdiz bae docih goenglaux, hoeng goenglaux gaenq dawz aendiemq gai bae, ok guek bae youz lo.

Doeklaeng, daxau sou ndaej fung saenq ndeu, dwg goenglaux sij ma, ndaw saenq naeuz: Bouxcoz, mwngz miz Banghdiz boux lwg neix, miz fuk lailai ha, vihliux gouq mwngz, de dawz maenz cienz ndeu dauqcawq bae cawx goengmbwn……dwg de gouq gij mingh mwngz, hoeng mwngz itdingh aeu ciengxlwenx geiqmaenh, boux goengmbwn caen haenx, dwg gij simgyaez gyoengqvunz.