Baez gangj daengz Duzmou, vunz couh siengj daengz duzde “ninzngoedngoed﹑gwn lailai﹑youh mwnh youh biz”, gij yiengh neix hawj vunz doiq duzmou miz yawjmbieng, hoeng daxboh gou couh mbouj dwg yienghneix, daxboh gig gyaez duzmou, doiq duzmou miz gamjcingz laegna dangqmaz.

Daxboh miz seiq beixnuengx, de baiz boux daihseiq. Seizhaenx ndaw ranz mbouj miz cienz, gwndaenj gig hoj, daengx ranz vunz ninz youq sam fungh ranzhaz, seizdoeng rumznit ci, seizhah deng fwnroh. Gwn mbouj imq, ndaem geij moux naz, daengx bi gyau haeuxliengz le haeux lij mbouj gaeuq gwn.

Daxboh gouj bi seiz cij ndaej youq aen hagdangz iq ndaw mbanj doegsaw. Seizhaenx sam boux dahcej hix cingq doegsaw, cienzsaw seiq boux lwgnyez aeu seiq haj bak maenz ne! Seizhaenx, ndaw mbanj ranzranz ciengx mouiq, muengh dwk duzmou majhung gai ndaej cienz hawj lwgnyez gyau cienzsaw! Vihliux hawj gyoengq lwgnyez ndaej doegsaw, daxgeq moix bi cawx ma song duz moulwg, saeqsim guengciengx. Daxboh moix ngoenz cuengqhag maranz, couh gip dwk caeuq gyoengq doengzdoih bae gip byaekmou, muengh duzmou maj hung maj biz. Hagdangz yaek hwnjdangz lo, duzmou iq hix menhmenh maj biz lo. Seizhaenx daxgeq couh heuh cangh gajmou daeuj ndaw mbanj, dawz song duz mouhung gaj lo. Yienghneix gvaq ndaej seiq haj ngoenz couh aeu ndaej cienz nohmou, seiq boux lwgnyez couh miz cienz doegsaw lo. Hoeng, mizseiz gij cienz aeu mbouj ndaej vaiq, gip ndaej daxboh dauqcawq ra cienz, mbouj gamj bae hagdangz. Couh yienghneix, daxboh yawj dwk gij mou ndaw ranz baenz duz baenz duz maj biz gaj gai, haemzhaemz hojhoj doeg sat liux siujyoz, doeg sat liux cuhcungh. Daxboh miz fuk, baengh swhgeij roengzrengz doegsaw, gauj hwnj aen cunghconh ndeu, doeklaeng ra ndaej faenh hong ndei ndeu.

Seizneix, moix baez daxboh lwnh gij saeh seiziq doegsaw, de cungj danqheiq naeuz: “Caeklaiq duzmou bang liux gou ha, mbouj miz duzmou, gou hix mbouj baenz ngoenzneix!” Gizsaed, dou cungj dingq ndaej rox, daxboh ndawsim docih duzmou, engqgya docih daxgeq, hix rox daxboh vih maz doiq duzmou baenzneix miz gamjcingz.

Ngeix daengz goj daxboh caeuq duzmou, gou caen dwg haenh gij swnghhoz ngoenzneix gyoengqraeuz. Yienznaeuz ndaw mbanj seizneix lij miz geij ranz vunz ciengx mou, hoeng gyoengqde mbouj dwg vih ciengx mou gai aeu cienz, cijdwg vih ndaej gwn nohmou “doj”!

Gou daj hwnj hagdangz doegsaw, couh mbouj souhgvaq gij gwndaenj haemzhoj, mbouj you gwn mbouj you daenj, doxgaiq yungh hagsib yienghyiengh cungj miz, siengj cawx gijmaz couh cawx gijmaz. Caemhcaiq, seizneix doegsaw hix mbouj yungh gyau cienzsaw lo. Daihgya siengjsiengj couh gangj gij saeh doegsaw, daihboh caeuq daihraeuz, gaenq fatseng bienqvaq gig hung! Caiq yawj gwndaenj gyoengqvunz ranzmbanj: Mbanjmbanj doeng goengloh, ranzranz miz ranzlaeuz, denva﹑soujgih﹑caijden yienghyiengh cungj miz. Song bi neix haujlai ranz ciep le vangjloz, caiq miz haujlai ranz cawx giceh lo! Ngoenzneix vunz ranzmbanj caiq mbouj lumj gaxgonq ityiengh bae gyau suiqhaeux, gyoengqde swhgeij banh gunghcangj, guh dajciengx, saedceij yied gvaq yied ndei.

Doengxhaemh gwn haeux, gangj daengz seizneix lajmbanj bienqvaq moqsagsag, daxboh cix baengh gij laeujangq guh le hot fwen ndeu:

Cwngcwz dangj ndei lai,

Gwnzbiengz hai vagim;

Cauxfuk hawj lwgminz,

Aencingz hung gvaq mbwn.