学习语文, 我有好方法

Yijvwnz cingzcik mwngz ndei lwi? Hagsib fuengfap mwngz deng lwi? Gou miz di fuengfap ndei hagsib yijvwnz, siengsaenq mwngz dingq le, doiq hagsib mwngz mizyungh.

Gij fuengfap ndei neix, gou hix dwg daj laeng bouxwnq hag daeuj.

Ban dou miz boux doengzhag hagsib cingzcik gig ndei ndeu, de couh dwg banhcangj ban dou, raeuz yawjyawj de baenzlawz hag yijvwnz.

Miz baez ndeu, gou geiq ndaej cingcing cujcuj, haenx dwg aen banringz ndit ronghsag ndeu, dou cingq hwnjdangz, lauxsae daezok aen vwndiz gig nanz ndeu, de cam le haujlai boux doengzhag, cungj mbouj miz aen gezgoj hawj de habhoz, lienz gou boux bingzseiz yijvwnz ak cungj lienzlienz ngauzgyaeuj. Doeklaeng lauxsae cam:“Bouxlawz ndaej hoiz- dap aen vwndiz neix, cingj yaengx- fwngz.”Banhcangj dawz fwngz yaengx ndaej sangvidvid, caj de hoizdap caez le, lauxsae ngaekgyaeuj riunyum- nyum. Roengzdangz le, gou laeglemx bae cam banhcangj, baenzlawz ndaej rox hoizdap aen vwndiz gig nanz neix. Banhcangj naeuz:“Gizsaed aen vwndiz neix gig genjdanh, byawz cungj ndaej hoizdap ok, dauqfanj gou cam sou, aen vwndiz baenzneix genjdanh, baenzlawz hoizdap mbouj ok.”Gou gazgwdgwd naeuz:“Mbouj rox vih gijmaz, aiq dwg hwnjdangz seiz mbouj nyinhcaen dingq ba!”Banhcangj naeuz:“Yienghneix baez- laeng sou aeu haeujsim dingq.”

Banhcangj hawj gou roxndaej, hwnjdangz aeu haeujsim dingq aen dauhleix neix, gou ciuq yienghneix guh, dahraix, cingzcik gou beij gaxgonq engq ndei lo, hwnjdangz nyinhcaen dingq dwg aen fuengfap ndei hag yijvwnz.

Lij miz baez ndeu, roengzdangz lo, gyoengq doengzhag cungj youq gwnz cauhcangz guhcaemz, gou buet baeg le, dauqma ndaw gyausiz ndoet raemx, yawjraen Siujmingz boux ndeu youq ndaw gyausiz yawj saw. De lwnh gou nyi, lai doeg di sawwnq gig miz yungh, mboujdanh ndaej rom gij swz ndei gawq ndei, yungh youq ndaw cozvwnz, hawj cozvwnz engq sengdoengh, youq ndaw gaujsi lij gojnwngz yungh daengz, roek nienz- gaep gaujsi baihndaw couh ciengz- ciengz miz diuz daez ndeu aeu gauj gij doeg goqrog gyoengq doengzhag. O! Lai doeg di saw, neix youh dwg aen fuengfap ndei hag yijvwnz.

Hwnjdangz nyinhcaen dingq, lai doeg di saw, song aen neix mwngz guh ndaej daengz lwi? Neix couh dwg fuengfap ndei hag yijvwnz.

(指导老师：陆庆峰)