Neix dwg haemh gig gyoet ndeu, baihrog rumz cihuhu gyoet haeuj ndok. Gou ndwn youq henz cueng muengh ok rog bae, vunz gwnz loh bouxboux cungj suk hoz, gipgip muengzmuengz ganj loh. Gou hai cueng, siengj yawjyawj baihrog miz geijlai nit. “Daiq nit lo!” Gou lienzmuengz gven cueng. Daxmeh ngoenzneix youq yihyen hwnjban banhaemh, lij aeu gwih danci dauqma, geijlai nit ha!

Daxmeh bingzseiz gig gvensim gou, dajleix gou gig ndei. Gou ndat lo, de beiz rumz hawj gou; gou iek lo, de loengh gij ndeigwn hawj gou; gou hozhawq lo, de dat makbingzgoj﹑aeu yinjliu daeuj hawj gou; gou mbouj haisim seiz, daxmeh nai gou﹑gujli gou, de mbouj guhsing saek di vih gou guh saeh.

Geiq ndaej miz baez ndeu, gou siengj aeu bonj sawgunghgi, couh dwk denva hawj daxmeh, heuh de roengz ban le bae suhden bang gou cawx saw. Dauqma le, gou baez yawj sawgunghgi, aiya, mbouj dwg bonj gou aeu haenx, daxmeh raen gou saeknaj mbouj doengz, cam gou:“Dwg mbouj dwg cawx loek la?” Gou ngaekngaek gyaeuj. Daxmeh simgip raixcaix, aeu bae vuenh saw. Gou nai daxmeh naeuz:“Daxmeh, gvaq song ngoenz caiq vuenh hix mbouj youqgaenj, seizneix gou hix mbouj gaenj yungh.” Seizhaenx gaenq dwg banhaemh bet diemj cung lo, baihrog youh nit youh laep, hoeng, daxmeh lau nguh gou hagsib, goq mbouj ndaej mbwn nit loh gyae, lij dwg bae suhden lo.

Daxmeh vihliux gou guh baenz dwgrengz, danghnaeuz youq haemhnit ndaej caem boi raemxgoenj ndeu hawj daxmeh dwggyaez gou, vih de raeuj ndang, gaij bae gij naet doengxngoenz guhhong, haenx geijlai ndei ha!

Gangj guh couh guh, gou ra aen boi daeuj, gig siujsim dwk riuj aen huzraemxgoenj, menhmenh caem raemxgoenj roengz ndaw boi bae. Gou itmienh caj itmienh siengj:Daxmeh dauqma le itdingh haenh gou. Gouj diemj seiq cib faen cung lo, daxmeh lij caengz dauqma, gou baez lumh aen boi, raemxgoenj liengz lo. Gou youh vuenh boi ndeu, mbouj yaep ndeu, raemx youh liengz lo. Vih gijmaz? Dwg mbouj dwg ci daxmeh vaih lo? Lij dwg……Sim gou hainduj mbouj onj hwnjdaeuj. Gou ngamq vuenh boi raemxgoenj ndei, couh dingqnyi yamqdin sug lo.

A! Dwg daxmeh dauqma lo. Gou angq dwk bae hai dou, daxmeh daiq gij rumz gyoet byaij haeujma, gou sikhaek dawz boi raemxgoenj fwiheiq huhu bongh daengz naj daxmeh, daxmeh doeksaet dwk yawj gou, ciep gvaq boi raemxgoenj ndaw fwngz gou, ndoet song gaemz le, naeuz:“Docih mwngz!” Seizneix, gou yawjraen ndaw lwgda daxmeh gamz gij raemxda ndongqliklik……De lumj- baenz mbouj rox gangj gijmaz ndei. Gou rox, yienznaeuz daxmeh mbouj gangj gijmaz, hoeng de rox gou gaenq majhung lo.

（指导老师：覃珍团）