□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Seizhaenx, caizmoubu bucangj Liu Dunghswngh、liengzsizdingh dinghcangj Vangz Gwzginz、caizban fucujyin Yin Gwnghgingh、caiz- cwngdingh dinghcangj Goh Cwngz daengj vunz, cungj dwg bouxhek ciengz daeuj bangunghsiz Veiz Gozcingh haenx.

Bi haeuxgwn ceiq dwgrengz haenx, ndaw cang haeuxgwn daengx swcigih cij lw 1 ik lai goenggaen haeuxgwn, cingzgvang yungyiemj raixcaix, Veiz Gozcingh caeuq Ho Hihmingz doxyaeng, couh lumj youq budui cijveih hoenxciengq nei, gaem ndei seizde sikhaek gietduenh, buet hawj liengzsizdingh 100 aen ciheiq, iugouz Vangz Gwzginz comz cuengq mbangj haeuxgwn youq 10 lai aen diemj gyaudoeng lai fuengbienh haenx, baij ganbu maenhndei maeuqdiemj guh cijveih, gyawz noix haeux le, cix doq yinz gvaqbae gouqmingh. De dansim miz mbangj dieg lanzdaengj diuh haeuxliengz, daegdaengq daengq caizmoubu bucangj Liuz Dunghswngh caenndang dwk dienhvah hawj mizgven diveij suhgi, naeuz gij cosih neix dwg sincung ngeixyaeng gvaq cix dingh okdaeuj, iugouz gak dieg gapbang banh ndei gienh saeh neix. Caenhguenj bihaenx seizcin souh cai gig haenq, hoeng aenvih cingsim baijbouh, cosih habdangq, doeklaeng cix ndaej dohgvaq nanzgvan.

Binaengz cingeng gonq, Veiz Gozcingh cungj aeu cam gij cinggvang cang rom vafeiz caeuq nungzyoz haenx, miz saeh cix bang gaijgez. Seizde Guengjsae miz siujliengh vaivei, cujyau yungh daeuj cawx gij vafeiz haeujguek.

Gij huqngoenzyungh Guengjsae, miz bi ndeu song bi hawciengz gunghawj mbouj gaeuq raixcaix, vunzlai miz yigen. Cingzgvang fanjyingj hawj Veiz Gozcingh, de cix caenfwngz raiz saenq hawj goengdaeuz Sanghaij, cingjgouz Sanghaij gunghawj huqngoenzyungh hawj Guengjsae.

Miz baez ndeu, de daj gij saenq lwgminz raiz daeuj haenx ndaej rox, diegrungh baihsaebaek Guengjsae miz mbangj yienh mboujmiz gyugai, doq ra Liu Dunghswngh. De naeuz: “Lauxliu, mboengqneix gou sou daengz gij saenq lwgminz raiz daeuj, fanjyingj diegrungh gyu deng duetgai, sou baez caz baez ndeu, caenhvaiq naemj banhfap gaijgez.” De rox, vunzlai diegrungh diegbya gaijfang gaxgonq gig nanz ndaej gwn gyu, haujlai vunz aenvih noix gyu hoz baenz ai.

(caengz sat)