Bineix Lozyez Yen gaihcanj minzcuz doxgiet senhconz hozdung, youq guh hozdung seiz, aen yienh neix yungh Vahgun caeuq Vahcuengh、Vahyauz、Vahmyauz daengj giethab, roengz daengz dieg saujsu minzcuz comzyouq haenx senhconz minzcuz faplwd fazgveih, aeundaej yaugoj ndei.

Aen yienh neix gij mbanj gyae haenx miz Bouxcuengh、Yauzcuz、Myauzcuz daengj saujsu minzcuz, mizdi saujsu minzcuz vwnzva suijbingz mbouj sang, dingq mbouj- daih rox Vahgun. Vih hawj vunzlai engq ndei dingq rox minzcuz cwngcwz, hawj engq lai vunz roxyiuj minzcuz cwngcwz, aen yienh neix cungfaen leihyungh gij youhsi swhyenz minzcuz ganbu rox Vahcuengh、Vahyauz、Vahmyauz daengj haenx, yungh Vahgun caeuq vah minzcuz“song vah”hingzsik senhconz《Cunghvaz Yinzminz Gunghozgoz Minzcuz Gihyiz Swcifaz》、《Gozvuyen Gij Gveihding Saedhengz (Cunghvaz Yinzminz Gunghozgoz Minzcuz Gihyiz Swcifaz)》、Dangj Cibbet Daih cingsaenz、“roekhaj”bujfaz cihsiz、Swcigih Daihcib Baez Dangjdaivei gij neiyungz gvendaengz “gensez aen gih minzcuz doxgiet cinbu mozfan”、minzcuz lijlun daengj guekgya minzcuz cwngcwz nem faplwd fazgveih cihsiz, saujsu minzcuz gig maij gij senhconz neix. Doengzseiz, vih demgiengz senhconz yaugoj, aen yienh neix vanzlij cujciz mizgven bumwnz yaenq gak loih faplwd fazgveih senhconz swhliu 8 fanh lai faenh, haeuj daengz ndaw mbanj bae fat bae bo. Daengz dangqnaj, aen yienh neix gyoepsuenq gvangjbo 2000 lai baez、fat swhliu 7 fanh lai faenh, 9 fanh lai vunz roxyiuj gij senhconz neiyungz.

Doenggvaq gaihcanj“song vah”senhconz minzcuz faplwd fazgveih gyauyuz hozdung, dajyinx nem bangcoengh saujsu minzcuz ginzcung roxyiuj nem gaemdawz gij gihbwnj gvanhdenj nem cihsiz gvendaengz minzcuz lijlun、minzcuz faplwd fazgveih、cwngcwz dangj raeuz, mboujduenh demgiengz yisiz roengz- sim henhoh minzcuz doxgiet.

(Yenz Gozveij)