□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh cuengqsim boux doengzdoih de guh hong.

Ho Hihmingz dwg vunz Gveilinz. Bi 1940 camgya sinhswginh caemh- caiq gya haeuj Cunghgoz Gung- canjdangj, gvaqlaeng， guh gvaq Cunghgung Cunghyangh Vazcunghgiz Cwngcwz Yenzgiusiz cujyin、boux Dieg Diegbien Suh-Vanj Daih’it Hingzcwnggih conhyenz、Suhbwz Hingzsuj cujyin. Cungguek moq laebbaenz le cix dauqma Guengjsae guh swngj cwngjfuj misuhcangj、caizgingh veijyenzvei cujyin. Bi 1952 diuh bae Guengjdoeng guh fuswngjcangj. Bi 1957, cunghyangh cawjleix gij saeh Guengjsae vih cai iek dai vunz haenx, geij boux goengdaeuz deng mbaet bae mingzdaeuz, cunghyangh ciuq gij iugouz Veiz Gozcingh, youh diuh de dauqma Guengjsae guh swngjveij suhgicu suhgi caeuq guh fuswngjcangj.

Veiz Gozcingh gig haeujeiq boux doengzdoih laux gvaq de 3 bi 、youh canghrox leixcaiz neix, Ho Hihmingz caemh gig gingqboiq Veiz Gozcingh boux suhgi daeuzit dwg bouxcieng、youh canghrox yungh vunz neix.

Veiz Gozcingh nyinhnaeuz, gij hong caizmou diegfueng couh lumj gij hong houginz budui, hong houginz guh mbouj ndei, boux hakcijveih caiq ak ndeu caemh dwk mbouj hingz ciengq; doengzyiengh, hong caizmou guh mbouj ndei, boux dangjveij suhgi、boux swngjcangj caiq gvai caemh nanz guh ndaej cingzcik ndei okdaeuj. De naeuz: “Hong caizmou couh dwg houginz lwgminz, houginz sevei. Hangh hong neix caeuq gwndaenj vunzlai doxlienz gig maenh, nangq daengz swnghcanj fazcanj caeuq sevei onjdingh.”

De soqlaiz yawjnaek caeuq dingjrengz hong caizmou. “Vwnzva Dagwzming” gaxgonq, de caeuq Ho Hihmingz gingciengz doxcaeuq ngeix- yaeng hong caizmou. Daegbied youq mwh haemzhoj duenhde, gyoengqde ceng mbouj lai ndwendwen cungj aeu anbaiz song sam bae hoih, cienmonz dingq gij gyoeblwnh hong haeuxgwn、gaicawx caeuq caizcwng ginhyungz haenx, caemhcaiq ngeixyaeng yungh maz cosih.(caengz sat)