“Gij dienheiq neix bouxvunz baenzlawz souh ndaej ne? Gwn donq haeuxcaeuz he daengx ndang dumz hanh liux.” Cunhcangj gwn sat amq haeux doeklaeng le ce duix cuengq dawh, fwt ndwn hwnjdaeuj, gaemdawz mbawbeiz couh yiengq gorungz hung ndaw mbanj byaij bae……

Mwh hoengq, vunz ndawmbanj cungj maij comz youq laj gorungz gangjgoj、dojbeq、dojgeiz, moix baez ndawmbanj hai hoih hix dwg youq gizneix hai.

Cunhcangj byaij daengz laj gorungz ngamq naengh roengzdaeuj, aen soujgih venj youq gyaeujvaq haenx couh yiengj lo. Boux gangjgoj boux dojbeq haenx sikhaek mbouj guhsing, riengz gij singyaem soujgih yawj bae.

“Dwg yanghcangj dwk daeuj. Baenzneix haemh le lij miz maz saeh ne?” Cunhcangj damznaeuz.

Dingqnyi dwg dienhvah yangh- cangj, daihgya couh gaen rwz dingq.

“Yanghcangj, mwngz ndei ha, miz maz saeh ni?” cunhcangj cam.

“Ngoenzrawz bouxdaeuz ndaw yienh yaek roengzdaeuj cazyawj lo, hong mbanj sou guh ndaej bangzlawz yiengh?” Yanghcangj naeuz.

“Cuengqsim ba, mboengqneix daeuj, daihgya roengzrengz caez guh, aen gunghcwngz ‘cingseuq ndaw- mbanj, cangndei ndawmbanj’haenx dou gaenq guh ndei guh sat lo, gungxgungx gemhgemh cungj byeuj ndaej seuqsak bae. Mbanj dou dwg aen mbanj sifan ndeu, gou baenzlawz ndaej ndojhong ne?” Cunhcangj naeuz.

Goemq dienhvah le, cunhcangj doiq daihgya naeuz:“Doenghgij ngoenzneix daeuj daihgya sinhoj lo, docih daihgya caeuq gou boiqhab、doxgiet haenqrengz bae guh aen gunghcwngz‘cingseuq ndawmbanj, cangndei ndawmbanj’neix. ”

“Gyoengqvunz mbanj wnq lij nyaengqfwdfwd cawqceq gij nyap- nyangj ndawmbanj gyoengqde ne.”Vangz Lauxloeg naeuz.

“Caeklaiq cunhcangj raeuz dwg bouxvunz coengmingz ndeu, mboujnex aen gunghcwngz neix baenzlawz ndaej guh sat baenz vaiq?”Daxboh Daegveih naeuz.

“Dwg ha! Gij nyapnyangj ndaw- mbanj rogmbanj、laengranz najranz、henzroen gungxgemh haenx, mbouj noix ha!” Daxmeh Gveivah naeuz.

“Baez cingleix, ndawmbanj seuqsak, gyaeundei lai lo.” Liuz Laujgvaij naeuz.

……

Daihgya mwngz coenz gou coenz, mboujdingz dwk haenh ndawmbanj seuqsak, haenh cunhcangj coengmingz.

Cunhcangj baez dingqyi, riuhoho naeuz: “Sojyij naeuz guh saeh mbouj ndaej hengzmanz guh, aeu siengj ndei banhfap caiq guh. Yienghneix couh guh noix ndaej lai lo.” Gangj sat, cunhcangj daekeiq fwngfwng.

Ngoenzneix haetromh, daeng- ngoenz seq daengz ndaw mbanj daeuj, rongh dwk sawj vunz yaek hai mbouj ndaej lwgda bae. Cunhcangj buenx boux ganbu ndaw yangh ndeu youq ndawmbanj cazyawj, ndawmbanj roen seuq luengq cingh, lienz riz nyapnyangj cungj mbouj raen.

Ndit yied daeuj yied ndat, cazyawj geij diuz luengq le, bouxdaeuz couh dauqbae lo.

Ngoenz daihsam haetromh, cunhcangj ninz youq gwnz congz, vunz singj lo, de lij mbouj siengj hwnq. Geij ngoenz neix daeuj, dienheiq ndat ndaej lumj yaek remj vunz, sawj vunz gwn mbouj van ninz mbouj onj, ngoenzneix haetromh nanz ndaej dienheiq liengz di, cunhcangj laep da hwnjdaeuj, gig vaiq youh ndonj haeuj ndaw fangzhwnz bae lo……

“Ling, ling……” Sawqmwh sing soujgih yiengj hwnjdaeuj, cunhcangj baez singj, haida yawj cung, gaenq gouj diemj lai lo.

Dienhvah dwg yanghcangj dwk daeuj, de naeuz gyoengq genjcazcuj ndaw yienh daeuj cazyawj haenx gaenq daengz buenq roen lo, daihgaiq buen diemj cung dem couh daengz ndawmbanj lo.

Cunhcangj robrab hwnqmbonq, gipmuengz daenj buh, catheuj swiqnaj sat he, couh okdou bae ciep lingjdauj.

Byaij ok rog dou, cunhcangj raen gwnz dieg gwnz roen miz baenz gumz baenz gumz gumzraemx, seizneix de cij roxnyinh haetneix dienheiq liengzsisi, laxlawz dwg haemhlwenz gyanghwnz doek fwn lo.

Ciengz fwn neix, dawz gij namhhenj goemq nyapnyangj haenx cungj cung bae liux; ciengz fwn neix, dawz gij nyapnyangj haenx cungj cung okdaeuj, gwnz roen gungxluengq, dauqcawq cungj dwg, baenzlawz yawj cungj mbouj gvaq da.

Byaij youq gwnz loh bae coh bakmbanj haenx, cunhcangj doeksaet dwk mbouj rox gangj vah bae.

Gyoengq lingjdauj haeuj mbanj cazyawj seiz, cunhcangj naj rim hanh liux, saeknoh bienq aeuj, suksuk byaij youq baihlaeng genjcazcuj.

Boux ganbu ndaw yangh roengz mbanj daeuj daiq vunz guhhong haenx raen gij nyapnyangj neix, bakaj loengloeng.

Yanghcangj haeb heuj haeb faenz.

Yencangj naj ndongjndat naeuz: Mbwn mbouj roxsoq……