“Seizneix vunz lajmbanj, ranz- ranz swnghhoz ndei……”Gyoengq lwgnyez Bouxcuengh itmienh ciengq fwen itmienh yiengq doenghnaz byaij bae. Sing fwen yaep he sang yaep he daemq, geijlai angqyangz, geijlai gyaeundei.

Gyoengqde daeuj daengz gaiq dieg hoengq henz rijiq. Raemxrij vili vala, saw dwk yawjraen gij rinsa daejraemx. Doiqmienh dwg benq nazhaeux yawj mbouj raen bien he, geij ngoenz gonq, doenghnaz lij dwg heusausau， baez yaep da, couh vuenh hwnj ndang buhmoq saek henjoiq lwenqda lo. Diuz ganjhaeux lawz cungj dingj diuz riengz fagfid haenx, gij riengzhaeux, couh lumj sienqdiuz gwnz yozbuj, diuz riengzhaeux ndeu, couh dwg aen yinhfuz diuqyet ndeu.

Gij nywjheu henz rij youh noengq youh oiq, lwgsai buet daengz gwnz diegnywj bae fan dingqdaeuj, gaeb biengzbeih, lij doxboemz doxbeij. Lwgmbwk dik lwgyienq, dwkdomq. Sing hemq, sing riu, sing betfwngz, raq beij raq sang. Diegnywj unqnup youh miz danzsingq, beij aen demh dijyuzgvanj ndaw singz lij ndei, neix lumjbaenz couh dwg aen yindung- cangz gag baenz he.

Guhcaemz baeg lo, caezgya naengh roengzdaeuj ietnaiq.Gij naj faj dem faj hoengzfodfod, lumj gij vayezgi nem raemxcaw nei. Mbouj rox bouxlawz baez heuh sing ndeu, caezgya cungj buet roengz ndaw rijiq bae, mizmbangj swiq naj, mizmbangj swiq fwngz swiq ga, lij mizmbangj dox buet raemx, sikhaek, daengx boux vunz cwxcaih dangqmaz.

“Seizneix vunz lajmbanj, ranz- ranz swnghhoz ndei, gwn ndei youq hix ndei, caen vuenheij ndaej lai.”Dwg bouxlawz youh ciengq fwen vaiqvued gyaeundei? Yaep ndeu, caezgya cungj gaen dwk ciengq hwnjdaeuj, gij sing fwen riengz rumz doengnamz cienz gvaq doenghnaz, cienz daengz ndaw sim vunz Bouxcuengh bae.

(指导老师：潘文清)