Bonjbauq siusik (gicej Vangz Sinhyungz) 7 nyied 11~15 hauh, aen benhveijvei《Cuenghhag Cungzsuh》hai aen hoih saemjgauj baez daihngeih, saemjdingh 《Bouxcuengh Dunghsij》banjdembouj. Swcigih Minzveij、Minzyijveij cujyin Luz Yenbenj 12 hauh banhaet bae gwnz hoih guh le cungyau gangjvah. Cunghgoz Segohyen yozbu veijyenz Sij Ginhboh gyausou、Minzcuz Cuzbanjse fucungjbenhciz Vangz Fungyenj、Gvangjsih Segohyen fuyencangj Vangz Cwngh、Yinznanz Swngj Hoihcuenghhag fuveicangj Hoz Cwngdingz daengj conhgyah yozcej rog gih caeuq doenghboux yozcej Cuenghhag ndaw gih gungh 22 vunz camgya haihoih. Haihoih geizgan, gyoengq conhgyah yozcej caezsim yenzgiu damqra gij sawgauj 《Bouxcuengh Dunghsij》bonj saw hungloet lizsij Bouxcuengh neix, vih caenh’itbouh guh ndei hong dembouj bien ndei bonjsaw caez doxyaeng doxgyau.

Luz Yenbenj naeuz, angq hoh Bouxcuengh yenzgiu daegbied dwg《Bouxcuengh Dunghsij》yenzgiu fuengmienh aeundaej cingzcik moq. Daihgya cungj rox, 《Bouxcuengh Dunghsij》 gaenq miz bonj nyuenz- banj 3 gienj he, seizneix yaek dembouj、coihbien gyahung daengz 8 gienj, neiyungz engqgya fungfouq, gijneix dwg cingzcik moq Cuengh- haggyaiq, caemh dwg cingzcik moq minzcuz yenzgiu yozgai aeundaej. Gij cingzcik moq neix doiq Gvangjsih caiqlij daengx guek daeuj gangj cungj miz yiyi hungloet. De naeuz, Swcigih Minzveij Minzyijveij geij bi neix daeuj gyalai caeuq gyoengq conhgyah yozcej daegbieg dwg Hoihcuenghhag daengj sedonz doxgap, lij yaek ciqaeu gij yenzgiu cwngzgoj neix daeuj dingh ok mbangj cwngcwz, cauhfuk minzcuz. Baenzneix dou cix caenhrengz guh ndei geij fuengmienh hong baihlaj: It dwg song veij caenhrengz cihciz caemhcaiq hemq- heuh gyagiengz hong yenzgiu minzcuz cojyouq, daegbied dwg Cuenghhag yenzgiu; ngeih dwg muengh gyoengq conhgyah yozcej youq guh Cuenghhag yenzgiu ndawde yawjnaek Vahcuengh Sawcuengh vwndiz; sam dwg song veij caenhrengz cihciz hong biensaw 《Bouxcuengh Dunghsij》; seiq dwg lienzdaemh oksaw Gvangjsih minzcuz yenzgiu conhgyah yozcej conhciz; haj dwg guh gij hong Nungz Cigauh yozsuz yenzdauj; roek dwg gyagiengz caeuq yozgai doxgap dwg aen gihbwnj yenzcwz guhhong minzveij minzyijveij.

Ciuq gaisau, 《Bouxcuengh Dunghsij》banjdembouj youq bi 2008 cingqsik doenghhong bouj bien, bi 2011 ndwen 5 guhsat baez saemjgauj daih’it, guj ndaw bineix guhsat baez saemjgauj daihngeih; banjdembouj youz nyuenz swcigih fucujsiz Cangh Swnghcin dang cungjcujbenh, miz 5 boux conhgyah mizmingz dang guvwn, 10 lai boux Cuenghhag conhgyah guh yozsuz aeundaej cingzcik ndei haenx dang boux cujbenh roxnaeuz bouxsij gak gienj. Ginggvaq roengzrengz guh gyawj cib bi seizgan, biensij le 300 fanh cih sawgauj. Mbat hoihsaemjgauj neix yaek saemj daujlun、yenjguj seizdaih、sangguj seizdaih、gingoz seizdaih、dujswh seizdaih 5 gienj; daengz ndwen 10 caiq saemj gihmiz seizdaih、gaenhdaih、minzcuz gihyiz swci seizdaih 3 gienj dem, daengx bonj saw daengz bimoq couh ndaej oksaw fathengz lo.