Geij ngoenz gonq, Lingzyinz Yen Cauzlij Yauzcuz Yangh Dangjveij、Cwngfuj cizgiz gaihcanj hong senhconz“Cauzlij gyaeundei·laj- mbanj seuqsat”. Dangqnaj, aen yangh neix gungh daengz lajmbanj fat cangyisuh 2000 lai faenh. Cimdoiq gij cingzgvang mizdi ginzcung dingq mbouj rox Vahgun youh yawj mbouj rox saw, aen yangh neix loegyaem gij cangyisuh gvangjbo aeu Vahcuengh、Vahgun、Vahyauzcuz gangj haenx, baez daengz ngoenzhaw couh leihyungh gvangjbo youq gwnz haw book, ginzcung ndaejnyi vah dangdieg, couh rox gij neiyungz nem iugouz, neix aeundaej yaugoj gig ndei. Cimdoiq gij cingzgvang dieg liz singz gyae senhconz mbouj daengz haenx, cwngfuj lij youq gwnz cisenhconz an gauhyinh lahbah, daengz ndaw mbanj book, hawj doenghboux ginzcung dieg gyae nem youq ndaw reihnaz guh hong haenx hix cungfaen hengzdoengh hwnjdaeuj.

(Loz Veihyij)