Youq ndaw swnghhoz, gou miz haujlai baez daih’it, ceiq hawj gou nanzlumz dwg baez daih’it cing cwz.

Ndaw hanzgyaj, gou dauqbae ranzcoj baez ndeu. Youq ranzcoj, ciengx miz song duz cwz, duz cwzmeh ndeu, duz cwzlwg he. Ngoenzsinghgiz gwn ngaizromh sat, daxboh doiq gou naeuz:“Sanhsanh, yaep dem mwngz cing duz cwzmeh ranz raeuz bae hawj Auseiq.” Gou baez dingq, naeng- gyaeuj cumh lo, yienznaeuz gou dwg bi duzcwz doekseng, hoeng cungj gig lau duz cwzmeh hungsang neix, engq gaej dwen bae cing de lo. Daxboh raen gou gig mbouj cingznyienh, couh naeuz:“Duz cwzmeh neix gig dingq vah, youh gig soh, mwngz cijaeu cing diuzcag bae doekgonq hawj de gaen laeng bae couh ndaej lo, gou caemh youq baihlaeng gwed hongdawz dem ne.” Gangj sat, daxboh cing cwzmeh ok riengh daeuj, ndenq diuz cag hawj gou.

Duz cwzmeh youh biz youh cangq, mbouj yawj gizwnq, dan yawj song ndaek gaeu youh hung youh soem de, gou couh lau lo. Gou mbouj nyienh cing duzde, youh lau daxboh veiznanz, gou cijndei dapwngq lo.

Daxboh sousib ndei hongdawz le, dou couh hwnjdin lo. Gou cing cwzmeh youq baihnaj, fwngzgvaz gaem gyaeujcag, mbouj hawj cwzmeh dep gou daiq gyawj, lau duzde bongh gvaqdaeuj daemj gou laemx. Daxboh gwed hongdawz riengz youq baihlaeng. Ciemhciemh dak, gou raen cwzmeh gig dingq vah, sim gou damzdingz lo, caemhcaiq seiz mbouj seiz cienq dauq laeng lumhlumh fouq gaeu de, gou gamjdaengz gig ndei caemz.

Daengz gwnz daihloh rog mbanj, cwzmeh sawqmwh dingz din “mo” sing ndeu, gou sim baez gaenj, diuzcag doq lotfwngz doek gwnz loh bae lo. Daxboh riu dwk naeuz:“Duzde dwg caeuq doengzdoih doxdongx hane, yawj mwngz lau baenz yienghneix!” Gou coh baihnamz yawj bae, raen youq ndaw reih gizhaenx miz duz cwz ndeu cingq muengh coh gizneix, gou caegcaeg riu lo. Daxboh coi gou vaiq gaenriengz bae gip diuzcag hwnj, dang gou gyaep hwnjbae seiz, diuzcag bub hwnj bub roengz dawz mbouj ndaej. Lij dwg daxboh miz banhfap, de ngamq hemq“ho” sing ndeu, cwzmeh couh dingz din roengzdaeuj, gou cij gaem ndaej diuzcag hwnj. Couh baenzneix, gou swnhleih cing duz cwzmeh bae daengz ranz Auseiq lo. Daj baezneix hwnj, gou caiq hix mbouj lau cwz lo.

Cing cwz caen mizyinx, gizsaed, cwz dwg cungj doihduz simsoh lauxsaed youh miz gamjcingz he!

(roek nienzgaep Veiz Sanhsanh)