□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh gig yinx yawj gij gogyaj gofoed, doq yawj doq cam gij daegsingq caeuq gvilwd sengmaj gofoed, lienz gij hamzliengh youjgihci caeuq gij hamzliengh dan、linz、gyaz, de cungj cam ndaej gig cingcuj.

De caeuq song boux lingjdauj diveij yaek lizhai Yungzyen seiz, lienzdaemh daengq gij goengdaeuz ndaw yienh naeuz, gyoengqde aeu guenj ndei 3000 lai moux naz gofoed bineix seizdoeng cij ndaem haenx, nyinhcaen gyoebcomz gingniemh, daezgung gingniemh caeuq guh boux- buengjyiengh hawj hong daengx gih doigvangq gofoed.

Bi 1963 ndwen12, Veiz Gozcingh youq gwnz hoih swcigih Daih Ngeih Gaiq Yinzminz Daibyauj Daihhoih Baez Hoih Daih’it vanzlij ndaej senj guh swcigih cujsiz. De daibyauj Swcigih Yinzminz Veijyenzvei guh cwngfuj gunghcoz baugau hawj gwnz hoih seiz, daegbied giengzdiuh aeu daengx gih hwnjheiq sawq ndaem caeuq doigvangq gofoed. De naeuz: “Ciuq gij gingniemh geij bi neix daeuj gak dieg sawq ndaem caeuq doigvangq haenx, ndaem gofoed le ndaej youq duenh seizgan dinj cix sou ndaej daihliengh bwnh youjgihfeiz, doiq ceng ndaej oklai, yaugoj gig yienhda, daegbied dwg gih raeuz namhnding lai, namh byom lai, youjgihci noix, engqgya aeu ndaem gofoed lo, yienghneix ndaej gaijndei namh, hawj namh engq biz. Ndigah, wnggai dangq ndaem gofoed dwg hangh hong youqgaenj guh swnghcanj nungzyez ndeu daeuj gaem. Gij dieg gaenq miz gingniemh haenx roxnaeuz gij dieg gaenq ndaem baenzgoeng haenx, wnggai miz giva miz yamqdin dwk hwnjheiq doigvangq; gij dieg mbouj sibgvenq ndaem haenx, yaek aeu hwnjheiq guh sawq ndaem. Raeuz aeu ceng ndaej youq 7 bi ndawde, guh baenz daengx gih ndaem gofoed 1000 daengz 1200 fanh moux (baudaengz naz ce ceh). Aen muzbyauh neix ndaej guh baenz ne, gij naz reih ndaw gih raeuz couh ndaej ciemhciemh gaijcauh baenz nazbiz, mizrengz dwk coicaenh nungzyez oklai, gaijbienq gij yiengh oknoix.” Hoihhung daibyauj saemjyaeng caemhcaiq baecinj le aen baugau neix, doigvangq ndaem gofoed ne baenz le gij yici caeuq hengzdoengh vunzlai daengx gih.

(caengz sat)