Gvangjsih raeuz miz goengq bya mizmingz ndeu heuhguh Byacwx.

Byacwx liz Nanzningz Si miz caetcib goengleix gyae, bya raez loegcib goengleix, miz ngeihcib goengleix gvangq, hamj gvaq Sanglinz、Majsanh、 Binhyangz caeuq Vujmingz seiq aen yienh.

Byacwx bingzyaenz sang miz cien ngeih mij, goengqbyasoem ceiq sang de heuhguh Lungdouz, miz it cien caet bak lai mij sang, dwg Gveicunghnanz goengq bya ceiq sang ndeu. Va caeuq raemxgienghdat gwnz Byacwx gig okmingz.

Bi 2012 ndwencieng co’ngux, dou bae youz Byacwx, seizde nit di, hix doek di fwn, daengx goengqbya heux rim mojlox. Miz roen suijniz daj dinbya hwnjbae daengz gwnz dingj, diuzroen van bae van dauq, miz giz gvangq giz gaeb. Laj bya liz gwnz dingjbya gig gyae, byaij sam diemj cung cungj mbouj daengz dingj, haici hwnjbae hix gig sinhoj.

Ngoenzde mbouj miz geijlai vunz bae youz, aiq dwg aenvih dienheiq mbouj ndei, seiqhenz cungj dwg mojlox, dou naengh youq ndaw ci, yawj mbouj raen gijmaz gingjsaek. Gyangroen nanz mbouj nanz raen miz ci roengz bya, gyoengqde aiqdwg haemhlwenz youq gwnz dingjbya youq ba.

Gyangroen miz mbangj dieg ndei youz, dou couh dingz ci roengzdaeuj yawjyawj. Rumz gig hung, bongj ndaej mbawfaex yiengjsasa, dou ngeixnaeuz dwg raemxgienghdat dem.

Gwnz bya miz haujlai faex dijbauj raixcaix, miz mbangj gaenq laux, hix miz mbangj lij oiq, moix go- faex gwnzde cungj hoij miz gaiq baiz ndeu, gwnz baiz sij miz gij coh gofaex caeuq miz gijmaz yungh.

Gwnz dingjbya dwg aen dieg vunz youq ndeu, miz gij gwn miz diegyouq, dwg aen dieg hawj vunz youz yietnaiq caeuq guhcaemz ndei ndeu. Dingjbya miz vunz cawj gijgwn gai, gij byaek haenx dingzlai dwg byaekcwx, gwn hwnjdaeuj gig diemz, gwnz dingj hix miz geij aen dan gai doxgaiq saejdaeuz, lumj nohsez、lwgsawz、soemj、faengxiq caeuq lwgbiek daengjdaengj.

Gwnz dingjbya miz roen doeng daengz gak aen diegyouz. Dou yaek bae yawj raemxgienghdat. Raemx- gienghdat liz dingjbya haemq gyae, diuz roen daj dingjbya doeng bae daengz dieg raemxgienghdat haenx dwg yungh rinbenj caep baenz, miz mbangj guh baenz mbaeklae, miz mbangj lij dwg lingqlangq, vunzyouz hwnjhwnj roengzroengz, yienznaeuz henz miz veizlanz, hoeng, youq gwnz yawj coh laj bae hix roxnyinh gig dwg- lau.

Bae yawj raemxgienghdat gyang- roen hix miz haujlai dieg ndei youz. Gwnz bya faex gig lai, gij faex haenx cungj dwg baenz yw lai, miz go faexgeq ndeu gaenq miz song bak lai bi lo, gofaexgeq youq dingjbya, nyefaex raemhrwdrwd, yawj hwnjdaeuj lumj aen liengj hung nei, youh lumj boux vunzlaux ginggvaq gig lai saeh ndeu nei.

Gwnz dingjbya miz va gig lai, dingzlai dwg va’in. Bi daengz ndwenseiq ndwenngux, va gwnz bya couh doxciengj doxsoemx hai lo, gyaeundei dangqmaz. Dingq vunz naeuz, diegguenj Byacwx moix bi cungj youq gwnz Byacwx gawjbanh ciet va’in, yinx baenz cien baenz fanh vunz ndaw guek guekrog daeuj yawj.

Vunz naeuz gwnz Byacwx miz bak lingz bet giz raemxgienghdat, ndawde aen ceiq hung dwg Raemxgienghdat Rienglungz, daih- ngeih dwg Raemxgienghdat Gvigim. Raemxgienghdat Gvigim sang baenz loegcib mij, gyang raemxmboq miz gaiq rin hung ndeu, yawj hwnjbae lumj duzfw nei, gij raemx ndaw mboq yawj hwnjdaeuj miz di ndaem, geizheih lai lo. Ngoenzde hix miz haujlai vunz daengz raemxgienghdat bae ingj siengq, dou hix ingj haujlai siengq guh geiqniemh.

Byacwx aenvih deihseiq labcab, dienheiq daegbied, doenghgo geq mbouj liux gangj mbouj caenh, goengqbya miz goengq sang goengq daemq, doxca gig hung, ndigah baenz bi seiqgeiq gingjsaek mingzyienj youh miz daegsaek. “Seizcin va, seizhah raemxgienghdat, seizcou fwj, seiz- doeng siet”, coenz vah neix couh dwg gangj hawj Byacwx.