Hozbwz Swngj Cunghyihyen Siuhva Neigoh Yez Sungh gyausou gaisau naeuz, lwglimz singq bingz、feih vansoemj, ndaej cangq beizheiq leih raemx、siu ndat cawz caep、siu foeg gejdoeg. Yienhdaih yihyoz yenzgiu hix byaujmingz, lwglimz ndat noix, hamz veizswnghsu E、gyaz、meij、linz、sinh、sih daengj vuedsingq cwngzfwn lai, dwg gijgwn hamz gyaz lai haenx, ndaej gyangq hezdangz、hezyaz、hezcij, doiq yw saej humz、baenzsiq、baezfoeg yaugoj haemq ndei.

Seizhah ndang vunz yungzheih baenz foegraemx, gwn danglwglimz ndaej siu foeg. Boux baenz foegraemx itbuen nyouh noix, danghnaeuz ngamq baenz foegraemx seiz baek lwglimz gwn, ngoenz daihngeih foeg couh siu bae, lienz gwn 6 daengz 7 ngoenz couh ndeidingh. Bouxlaux seizhah din ga baenz foegraemx, ndaej aeu lwglimz ngauz cuk gwn.

Yez gyausou naeuz, seizhah vunz amqbak mbouj ndei caeuq baenz dungxraeng, cingqciengz sup haeuj yingzyangj doxgaiq couh noix, aenndang daise luenhyab, caemhcaiq yinxhwnj aenndang noix yingzyangj roxnaeuz baenz cungj bingh wnq. Ndigah, cawz haeujsim bouj yingzyangj le, lij aeu lai gwn di gijgwn cing ndat、leih caep he dem. Lwglimz dwg huqndei cawz caep, aeu nyaq lwglimz caeuq naeng makdoengj cawj gwn, roxnaeuz aeu lwglimz caeuq haeuxlidlu baek dangz gwn, hix ndaej leih caep. Aeu lwglimz caeuq haijdai caez cawj gwn, ndaej gaijndei haexgaz; boiqhab daeuhfouh caeuq mbaw gosijsu gwn, ndaej coicaenh dungxsaej cingqciengz yinhsoengq, coi lwed lae baedauq, caemh ndaej byom ndang.

Yez gyausou daegbied daezsingj naeuz, cawj lwglimz seiz, ceiq ndei aeu dangzndaem caeuq dangznding daeuj daiqlawh begdangz dwk roengz, hoeng boux ndang byom caeuq boux nyouh lai mbouj hab gwn lai.