Seizhah, boux heuj miz bingh bae yihyen siengj ciemz heuj, canghyw itbuen mbouj haengj bang ciemz. Gohyoz gaengawq miz song diemj:

Daih’it, seizhah mbwn ndat, vunz ok hanh lai, gig yungzheih deng ganjyenj. Ndang vunz vihliux youq ndaw seizhah naengz veizciz cingqciengz sengleix hozdung, aeu gyagiengz gak aen diuzcez gihci daeuj veizciz cingqciengz ndangraeuj, cungj fanjying neix hawj giz baksieng heuj engq yungzheih deng sigin ciemq haeuj.

Daihngeih, ciemz heuj le camhseiz louz miz aen baksieng ndeu, daegbied dwg giz gaenh diuzheuj. Seizhah, aenvih nemmuek conghbak baihndaw sailwed conghbwn mingzyienj mbegvangq, lwed seiqhenz sailwed conghbwn nanz gietgongj, gig yungzheih ok lwed roxnaeuz foeg lwed. Seizhaenx, danghnaeuz siudoeg mbouj yiemz, sigin couh rox youq giz foeg lwed sengmaj、sanjlah, yinxhwnj ganjyenj. Baez deng ganjyenj, couh rox vaiqvet yiengq seiqhenz noh、giz unq caeuq giz miz geh haenx mbegvangq, cauhbaenz cujciz laj nemmuek ganjyenj、gawhfoeg caeuq insep youqgaenj. Doeklaeng bak aj mbouj ndaej, daengx ndang hawnyieg.