Haujlai nanz mbouj caeuq daxmeh bae youzdin lo, mbouj rox vih gijmaz, bi’ndwen yied hung, sim gou caeuq daxmeh lumjbaenz yied liz yied gyae lo. Daxmeh mbouj caiq gangj gojgaeq hawj gou, dangyienz, gou hix mbouj gyaez dingq gojgaeq daxmeh lo, cungj raen gij gojgaeq daxmeh gig dandiuh, dwg gangj hawj nyez iq dingq. Ngoenzneix gyanghaemh, gou caeuq daxmeh dauqdaej youh itheij bae youzdin lo. Dou menhmenh youz gwnz gai gvangqlangh haenx. Laj lohdaeng, gij ngaeuz gou caeuq gij ngaeuz daxmeh deng rag gig raez gig raez.

Daxmeh sien hai bak com gou: “Danghnaeuz diuz mingh raeuz cij lw ngoenz ndeu, mwngz yaek guh gijmaz?” Gou mbouj naemj saekdi aj bak couh naeuz: “Dwk dennauj、ninz、gwnhaeux ha.”

Daxmeh cam gou vih gijmaz, gou naeuz: “Dwk dennauj dwg gou gyaez. Ninz dwg vihliux mbouj hawj cihgeij miz gvaengzda ndaem, gou mbouj siengj hawj cihgeij bienqbaenz duzyungzmauh. Gwn haeux dwg vihliux mbouj hawj cihgeij baenz duzfangz dai iek!”

Gou cam daxmeh:“Mwngz ne?” Gou laihnaeuz daxmeh haengjdingh dwg dap naeuz guhhong、cawx doxgaiq、lijyouz.

Hoeng gou loek lo.

Daxmeh dingz yaep ndeu, sing mbaeu dwk naeuz:“Daih’it, buenx mwngz guhcaemz; daihngeih, dak mwngz hawj boux ndaej ingbaengh he; daihsam, cihgeij yawjyawj saw, dwkdwk giuz.”

Seizhaenx, gou nyaenx mbouj ndaej raemxda conh.

Seizhaenx, gou cij caencingq gamjdaengz ndaw seiqgyaiq daxmeh cienzbouh dwg gou, daxmeh dwg yienghneix gyaez gou. Seizhaenx, ndaw uk gou sawqmwh yienh ok gaxgonq gou hat daxmeh, gou baez dem bae nyex de fatheiq, daxmeh dauq baez youh baez yienzliengh gou, bauyungz gou.

Seizhaenx, gou siengsaenq caen gyaez, siengsaenq gou dwg boux ceiq vuenyungz, siengsaenq ndaw ranz dwg dieg ceiq raeujrub, siengsaenq gij vahdamz daxmeh dwg gij vah ceiq gyaeundei gwnz seiqgyaiq.

Gou siengj doiq daxmeh gangj: Ciuh laeng, gou lij guh dahlwg mwngz. (haj nienzgaep Sunh Sinhyi)