□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Gozcingh cam:“Raeuz gag ce ceh roengzdaeuj mbouj miz saeh ba?”

Dingh Saulanz han:“Daj gij sizcenj Yungzyen daeuj yawj, gag ce ceh mbouj baenzlawz, hoeng gij naz ganq ceh haenx doiceiz ndaemnaz ne couh yingjyangj deng canjlieng haeuxcaeux. Banhfap Gyanghsih dwg, gaen ceh gai maenzngaenz ndeu, linghvaih ciuq baizgyaq ciengj gai 5 gaen haeux、5 gaen vafeiz. Yiengh- neix, swnghcanjdui cix haengjheiq guh naz ce ceh lo.”

Song boux goengdaeuz diveij cungj genyi, Guengjsae hix aeu hag Gyanghsih cij ndaej.

Veiz Gozcingh haenhdoengz, hoeng de naeuz aen vwndiz neix aeu baema caeuq bumwnz caizmou doxyaeng baez ndeu, suenqsuenq ciengq le caiq ndaej dingh. Gvaqlaeng, bumwnz caizmou ginggvaq ngeixyaeng le, daj saehsaed Guengjsae okdin, roengzfat le gij vwnzgen ciengj gai gvendaengz soucawx ceh gofoed haenx.

Veiz Gozcingh youhmwz dwk naeuz:“Yienghneix Yungzyen ndaej fat daihcaiz lo. Sou ndaej fatcaiz, hoeng gaej guh deihcawj bw.”

Veiz Gozcingh daj gij canloz daengxbuenz Guengjsae bae naemj, gipseiz gaijgez le song aen vwndiz Yungzyen daezok haenx, mboujlwnh dwg doiq Yungzyenz vanzlij dwg doiq daengx gih fazcanj gofoed daeuj gangj, cungj dwg gij gezcwz gig youqgaenj.

Gangj sat gij saeh gofoed le, Cangh Dazmingz daezok, siengj gyoeblwnh gij saeh Yungzyen fazcanj hongsaeh faexndoeng haenx hawj goengdaeuz. Veiz Gozcingh angq naeuz: “Ndei ha, gou ngamq haeuj dou cix bihbingz gij faexcoengz gwnz ndoi song henz goengloh sou lumj boux goenglaux ndeu, yenveij siengj baenz- lawz guh hongsaeh neix, gangjgangj vei!”

Cangh Dazmingz naeuz, daeg- diemj Yungzyen dwg vunz lai、naz reih noix、goengqbya lai, siengj hawj vunzlai ndaej baenzmiz, doengzseiz youh guh ndaej ok gung’yen hawj guekgya ne, couh aeu yungh ndei bya ndoi. Yenveij miz aen naemjfap ndeu, Yungzyen fazcanj nungzyez aeu faex haeux caez gaem, fwngz gaem haeux, fwngz gaem faex. Seizneix gaenq hainduj boiq boux fuyencangj caeuq fugihcangj cienmonz gaem hong ndoengfaex haenx lo, gyagiengz lingjdauj hongsaeh ndoengfaex. Gij “goenglaux” caxcagcag haenx, yaek cugbouh gaijmoq. Daengx yienh cujyau ndaem gofaexmbawhung, habdangq ndaem mbangj gofaex- mbawcim, yienghneix daeuj daezsang gij gaiqbiz namh caeuq bauj ndei raemx, bouj gij mbouj cuk Yungzyen mbouj miz suijgu hung caeuq dah noix haenx.

(caengz sat)