Seizdoeng byonghhwnz, mbwn dinghswdswd, gyoetsadsad.

Meh Dunghmeiz ngamq hwnq mbonq, sawqmwh dingqyi singheuh:“Meh, meh, hai dou……w……”,“a……”, lij cienz daeuj sing daej lwgnyez dem.

Dingqnyi singyaem, meh Dungh- meiz rox dwg dahlwg caeuq daeglan, de sikhaek roengz mbonq byaij daengz gyangranz, yawj aencung venj youq gwnz ciengz, gaenq cib diemj ngeihcib faen lo.

Seizneix baenzneix laep, baenz- neix gyoet, dahlwg caeuq daeglan vihmaz ma ranz? Meh Dunghmeiz naemj dwk, nyinhdaengz gijmaz saeh lo, neix gaenq mbouj dwg baez ndeu song baez lo, de ndatheiq dwk daeb din doemdoem, doq hai dou doq ndaq, dawz cojcoeng cibbet daih daeggvan Dunghmeiz cungj ndaq liux bae.

Dunghmeiz soengj danci haeuj dou, song da ndingfoeg, daej dwk saekwk bae, baez raen daxmeh engqgya siliengz dwk gangj mbouj ok vah bae.

Meh Dunghmeiz umj daeglan laeng danci roengzdaeuj. Daeglan bineix seiq bi, de ndang saenzdidi, mbouj rox dwg nit roxnaeuz dwg lau. Raen daengz neix, meh Dunghmeiz ndaw sim lumj deng mid gvej nei, in raixcaix, nyaenx mbouj ndaej youh ndaq daeggvan Dunghmeiz ciengz he, de ndaq ndaej myaiz sinzdidi, ndaq ndaej naj nding rwz dit, ndaq naiq lo, de maenj naeuz:“Danghnaeuz ndaek daigaj neix daeuj heuh mwngz, gou mbouj heuh de guh duzfw ruenz ok dou, gou duet vaq bae youz gai.”

Daxboh youq henz ciep naeuz: “Duz cukseng neix, yawj gou ngoenz- laeng baenzlawz sousib de!”

“De caiq haeuj ranz daeuj, gou dik ga de raek bae!” Daeggo hix daeujdaengz lo, hozndat dwk naeuz.

Daeggvan Dunghmeiz dwg boux guh canghdoz ndeu. Moix ngoenz gai sat nohmou, couh roengz mbanj bae ra mou, fuengbienh ngoenzlaeng miz nohmou hwnj haw gai.

Bouxlaux naeuz: Buenq bit buenq gaeq haex dwk ndang, gaj mou gaj yiengz ngaenz dwk daeh. Vihliux lai canh di cienz, gvan Dunghmeiz mbouj miz seizlawz hoengq gvaq, hongreih hongnaz cungj dwg Dunghmeiz ganq, bouxgaenx mbouj fouqmiz hix gwn imq, ranz de saedceij lij gvaq ndaej mbouj loek.

Ngoenzneix Dunghmeiz bae haw, swnhloh bae aen dangainoh gvan de yawjyawj, gvan de mbouj youq, gwnz dan lij baij miz dungxsaej、noh biz caeuq nohvaenzhoz.

Dunghmeiz cam boux henz dan: “Gvan gou bae gizlawz, mwngz rox lwi?”

Boux henz dan naeuz:“De caeux couh okbae lo, lw di noh neix hawj gou bang gai.”

Dunghmeiz yawj soujbiuj, gaenq dwg sam diemj cib faen. De fwt ndatheiq hwnjdaeuj, sousib gij noh lw haenx dauqbae.

“Duzma gaij mbouj ndaej gwn haex! Duz daigaj neix, noh gai caengz sat couh ndonj haeuj gizlawz bae guhdoj? Mwngz ndonj lajnamh bae, gou hix rag mwngz okdaeuj!” Dunghmeiz doq byaij doq ndaq.

Gai iq gai hung, gungxgungx gemhgemh, Dunghmeiz cungj ra doh liux, hoeng, lienz duzngaeuz gvan de cungj mbouj raen, de daiq aenndang naiqnuek ma ranz……

Song bi gaxgonq, daeggvan Dunghmeiz youq ranz guh hong reihnaz, seizhoengq de yinxhwnj guhdoj, naeuz bae ndaq dauq cungj mbouj gaij dem. Miz ngoenz ndeu, Dunghmeiz hemq naeuz: “Gij saedceij neix mbouj miz fanhfap gvaq lo, bae lizvwnh ba!”

Couhdwg vih gienh saeh neix, Dunghmeiz baez daih’it aemq lwg ma ranzmeh.

Ngoenz daihsam, daeggvan Dunghmeiz daeuj daengz ranzdaiq ciep Dunghmeiz, meh Dunghmeiz vid gen vid ga ndaq, dawz cojcoeng gvan Dunghmeiz ndaq liux bae, daxboh yaengx hwnj gaiq sauqbaet, lumj gyaep mou ok suenbyaek nei, dawz gvan Dunghmeiz gyaep ok dou bae; daeggo Dunghmeiz gaemdawz aekbuh de, haeb heuj naeuz: “Mwngz gamj hangz dahnuengx gou? Lau mwmgz gwn mbei duzguk loba? Deuz ok ranz gou!”

Doiq ndaek sai yienghneix, mwngz ndaq daengz saihoz goenq bae hix dangq roet dwk haw, doeklaeng heuh de youq dangqnaj daihgya sij saw mieng gvaq, saehcingz cij caem roengzdaeuj.

Song bi gvaqbae, gvan Dungh- meiz gangj daengz guh daengz, mbouj caiq guhdoj lo.

Mbwn laep yaep he, gvan Dunghmeiz ma ranz lo. Daeggvan baez haeuj dou, Dunghmeiz couh ndaq naeuz:“Ced meh mwngz, noh caengz gai sat, couh ndonj gyawz bae guhdoj lo? Duz lwgndai mwngz caen dwg ma gaij mbouj ndaej gwn haex.”

Daeggvan maegsaeg yawj Dungh- meiz, cam:“Byawz gangj gou bae guhdoj?”(caengz sat)