Gaenh bi daeuj, Lungzcouh Yen gyadaih ligdoh vatgud、henhoh nem swnjcienz vwnzva minzcuz, cizgiz beizyangj nem dajcaux binjbaiz vwnzva minzcuz, aeundaej cwngzyau yienhda.

It dwg dajcaux Denhginz yisuz vwnzva binjbaiz, beizyangj daihlaeng rox Denhginz. Laeb“Denhginz lwg- mbwk danz ciengq cujhoz”, dawz Denhginz yisuz buen hwnj vujdaiz, ndaej cingj bae ndaw guek rog guek yienjok nem doxdax 80 lai ciengz, 3 baez hwnj Cunghyangh Densidaiz Vanjvei. Doengzseiz, haeujsim bang- fuz yenzswnghdai Denhginz yezyiz vwnzyidui, dangqnaj gungh bangfuz 17 aen.

Ngeih dwg swnjcienz nem fazcanj hawfwen Bouxcuengh dangdieg. Cizgiz dazyinx ginzcung, guh ndei hong haifat henhoh hawfwen Bouxcuengh. Dangqnaj, daengx yienh miz 53 aen ciet hawfwen Bouxcuengh, ndawde 11 aen ciet hawfwen cawzliux miz doiq fwen, lij miz Caijdiuh、sailungz、ciengj bauqva hozdung dem.

Sam dwg gyagiengz vwnzva yizcanj henhoh nem sinhbau. Cawz- liux sinhbau ndaej Denhginz、fwen nem bouxswnjcienz Denhginz 3 hangh swcigih gaep feihvuzciz vwnzva yizcanj, gunghyi conzdungj、ndang- daenj、gojgaeq ndawbiengz daengj 22 hangh feihvuzciz vwnzva yizcanj hix ndaej geiq hwnjdaeuj.

Seiq dwg“sinhvwnz Vahcuengh”cezmuz, gaihcanj Cuengh Gun song vah saw sonhag mozsi. 2007 nienz daej, ndaw yienh densidaiz haibo“sinhvwnz Vahcuengh”cezmuz, neiyungz lai cungj lai yiengh. 2009 nienz, ndaw yienh Vujdwz Yangh Cungsim Siujyoz cingqsik hai Vahcuengh nem Vahcuengh suenq- soq daengj gohmuz. Linghvaih, Lungzcouh Yen Minzcuz Cunghyoz youq sonhag ndawde gaihcanj Cuengh Gun song vah saw sonhag mozsi; hai Denhginz yisuz hingcibanh、Fwen- cuengh hingcibanh, caemhcaiq cizgiz gaihcanj haizgieg、maxgyaek、lwg- gyangq、bau aendomq daengj minzcuz conzdungj dijyuz hangh- moeg.

Dangqnaj, aen yienh neix vwnzva hawfwen Bouxcuengh moix bi ciuyinx le ndaw guek rog guek haujlai conhgyah、yozcej daeuj gaujcaz ngonzyawj, yingjyangj gig hung; vwnzva Sawndip hen ndaej ndei, Ginhlungz Cin dwg dieg daibyauj Sawndip baihnamz gih raeuz; Denhginz vwnzva mingz riuz lajmbwn, gaenq baenz cungj byauhsiz minzcuz nem vwnzva Lungzcouh、Cungzcoj nem Gvangjsih. 2007 nienz, aen yienh neix ndaej heuhguh“Cunghgoz aen mbanj Denhginz”; 2008 nienz, ndaej heuhguh“Cunghgoz vwnzva ndawbiengz lijyouz sifangih”; bineix 3 nyied, ndaej Swcigih Vwnzva Dingh heuhguh“Gvangjsih aen mbanj yisuz ndawbiengz”.

(Lij Daz)