Duenh vuengzgim seizgan gwn yw. Yenzgiu ndaej rox, ndang vunz ngoenz ndeu gwn yw vuengzgim seizgan dwg gyanghaet 8 daengz 10 diemj、lajbyonghngoenz 2 daengz 3 diemj. Gwn haeux sat buenq diemj cung doxhwnj gwn yw mboujdanh ndaej fuengz rub myaiz、dungx fanjvei, caemhcaiq mbouj gamjdaengz feih yw haemz dem.

Langh liengz caiq gwn. Dohraeuj ywdoj gamhanh youq 15 daengz 36 doh dauqndaw, baez gwn couh mbouj gamjdaengz haemz lo.

Ndwnj vaiq di. Sizcenj cwngmingz, ywdoj louz youq ndaw bak seizgan yied nanz, couh rox gamjdaengz yied haemz, ndigah aeu vaiq di ndwnj roengz dungx.

Habdangq lai gwn raemxgoenj raeuj. Aenvih gwn yw le, lij mizmbangj yw louz youq ndaw bak, baez gwn raemxgoenj raeuj couh gig vaiq cung feih haemz yw roengzbae lo.

Vahsug naeuz:“Yw ndei feih haemz ndei yw bingh”, gij yw cangq ndang couh dwg yungh gij haemz de daeuj dabdaengz ywbingh yaugoj lo, ndigah, raeuz gaej you naeuz feih haemz couh dingz mbouj gwn yw, wnggai ciuqei canghyw daengqnai bae gwn yw cijndaej.