□ Hoz Saubangj sij Cinz Siengzcouh Liuz Gingliuj Cinz Siengzgen hoiz

De lij doiq song boux lingdauj Yilinz Diveij naeuz: “Yungzyen aen yienh angjda neix youq dieg sou ok, dieg Yilinz ndaem gofoed ne cix wnggai vaiq gvaq dieg wnq, ndei gvaq dieg wnq.” Veiz Suveih sikhaek naeuz: “Dou itdingh ciuq gij vah cijsi Gozcingh dungzci bae guh, caenhvaiq dawz gij gingniemh Yungzyen sawq ndaem gofoed haenx doigvangq hawj daengx Yilinz.”

Yenveij daezok, vihliux hwnj mbaek ndeu mbefat bwnhfoeg, genyi youq Yungzyen banh aen cangj ceh raetfoegrag ndeu.

Veiz Gozcingh cam:“Aeu geijlai ngaenz?”

Dingh Saulanz han:“Daihgaiq cib fanh ngeihcib fanh.”

Veiz Gozcingh nyeux gyaeuj coh Veiz Suveih caeuq Cangh Yungzlinz cam:“Sou yigen dwg maz?”

Veiz Suveih byaujsi: vihliux doigvangq ndaem gofoed, guh aen cangj neix dwg bietdingh aeu.

Cangh Yungzlinz caemh nyinhnaeuz, Guengjsae yaek aeu miz aen cangj ceh raetfoegrag bonjfaenh, Yungzyen ndaem gofoed byaij youq baihnaj, youq gizneix guh aen cangj haenx habdangq lai, muengh ndaej lied haeuj gij giva swcigih bae.

Veiz Gozcingh youh cam:“Gisuz miz maz vwndiz?”

Dingh Saulanz han:“Dou ndaej cingj vunz daeuj sonyinx.”

Veiz Gozcingh naemjnaemj le, dangciengz bekbanj naeuz:“Yiengh- neix ba, swcigih hawj sou 10 fanh maenz gonq, mbouj gaeuq caiq gangj, gou baema le caeuq Hihmingz dungzci naeuz baez ndeu.” Bungz deng gij saeh nangq daengz ngaenz, Veiz Gozcingh soqlaiz cungj aeu caeuq Ho Hihmingz boux faenguenj caizmou neix doxyaeng cij dingh. De lij naeuz: “Gunghcangj gietdingh banh le couh aeu banh ndei bae, aeu genhciz cizlieng sang, gij raet aeu hab biucinj. Huqok mboujdanj gung hawj Yungz- yen caeuq dieg Yilinz, vanzlij yaek gung hawj daengx gih.”

Cangh Dazmingz caeuq Dingh Saulanz cungj byaujsi, Yungzyen itdingh ciuq gij iugouz Gozcingh dungzci bae guh, nyinhcaen banh ndei aen cangj neix, huqok gung hawj daengx gih.

Yenveij lij daezok, seizneix ceh gofoed cungj dwg daj swngjrog cawx ndaej, mbouj dij, genyi Guengjsae gag ce ceh roengzdaeuj yungh.

(caengz sat)