Vunzmbanj raeuz baeznaengz doxbungz itheij gangj gojgaeq, coenz vah daih’it mbouj dwg cam mwngz miz geijlai cienz, miz geij caengz laeuz, cij dwg cam lwg mwngz aeu bawx baenz ranz caengz, miz geij boux lan la.Cam ndaej deng, aenvih lwg aeu yah baenzranz dwg ciuhvunz raeuz gienh saeh ceiq hung ndeu.

Bajseiq mbanj dou mboengqneix ceiq simsangj lo, aenvih lwg de ngamq aeu ndaej bawxmoq. Bawxmoq ngamq ma, Bajseiq bungz vunz couh gangj, nyangz vunz couh naeuz: “Gaxgonq vunz gwj naeuz bawx gou gaenx gwn gik guh, vunz youh nyangq, heuh gou gaej aeu de guhbawx. Hoeng, gou raen de mbouj dwg lumj vunz gangj yienghhaenx bw. Bawx gou vunz youh gvai youh gaenx, bak mbaeu vah diemz, haethaemh heuh gou daxmeh, baet ranz saeg buh dajcawj, yienghyiengh ceng bae guh, lij heuh gou gaej guh baenzlai hong lo. Dingz bawx neix ha, diemj daeng bae ra hix nanz ra ndaej bw, haha!” Bajseiq gangj sat, riu ndaej hangzgwnz mbouj haep hangzlaj. Gyoengqvunz dingq le, cungj haenh naeuz Bajseiq mehlwg baenz ndei lo.

Doeklaeng, daeglwg Bajseiq bae diegrog guh nungzyez gihbwnj gensez, de naeuz aeu bae ndwen lai cij dauqma. Daj seizhaenx hwnj, Bajseiq ngoenz beij ngoenz najsaep lo. Miz vunz cam de:“Bawx ndei mwngz baenzlawz yiengh?” Bajseiq gyangz gaemz heiq ndeu, ngauzngauz gyaeuj menhmenh byaij deuz lo. Gyoengq- vunz naeuz:“Raen caengz, vahsug gangj, ‘gaej haenh bawx samhaet, gaej haenh guen caet ngoenz’. ‘Loh gyae rox rengz max, baenanz rox simvunz’, gij vah neix gig deng bw.”

Aenvih daeglwg Bajseiq mbouj youq ranz, bawx Bajseiq beizheiq ngoenz beij ngoenz lai rwix. Hainduj dwg mbouj guh hong mbouj guhsing, caj Bajseiq cawj haeuxbyaek ndei le, de cij rox gaem dawh. Mizseiz, Bajseiq mbouj ndaejhoengq, de cawj haeux cug le, mbouj hawj Bajseiq gwn. Bajseiq naeuz de, de lij ndaq Bajseiq: “Gou mbouj hawj mwngz duz manaez neix gwn!” Bajseiq nyienjheiq naeuz: “Aenbak gaej rwix lai, gou naengh lwnh lwg gou nyi, mwngz mbouj ndeigvaq bw. Mwngz doiq gou ndei gou mbouj gangj de nyi.” Bawx Bajseiq daihsing naeuz:“Mwngz gamj lwnh de nyi, gou moeb mwngz duz nyaenma neix dai bae.” Mizseiz, dahbawx heiqhwnj, youh ndaq gaeq baex nyaen, youh fad dwix gaeuh daengq, fad denfunghsan vaih bae. Bajseiq mbouj rox doek geijlai raemxda. Mizseiz cij dwg daej dwk gouz de, naeuz gaej fad doxgaiq, miz vah ndeindei gangj. Hoeng dahbawx dawz gij vah Bajseiq dangguh rumz gvaq byaifaex, yied daeuj yied nyangq. Mizseiz, Bajseiq haeb faenz haeb heuj, gag naeuz: “Dingz bawx daiced neix cix aeu ndaej, itdingh heuh daeglwg liz de okbae! Ced meh de!”

Miz di vunz mbanj raen dahbawx neix nauh ndaej ranz Bajseiq ma vueng gaeq luenh, couh bae gienq songde. Dahbawx cix ndaq naeuz: “Sou deuz, gven sou maz saeh.” Doeklaeng, mbouj miz vunz bae gienq lo, cij dwg youq baihlaeng doiq Bajseiq naeuz: “Heuh lwg mwngz vaiq roemx de okbae.” Miz ngoenz ndeu, dahbawx youh fouz saeh ra saeh caeuq Bajseiq doxceng hwnjdaeuj, de dub fwngz Bajseiq sieng lo. Bajseiq daej mbouj ok sing daeuj, ndaw sim naemj naeuz: “Lwg gou dauq, mwngz dai dingh lo!”

Ngoenzhaenx, daeglwg Bajseiq dauq lo, de baez haeuj mbanj couh miz vunz lwnh de, naeuz yah de baenzlawz baenzlawz nyoegdaih boux- laux. De dingq lo, hozndat raixcaix. Dahbawx nyi naeuz de dauqma le, naj bienq heu liux, de rox mbouj ndei lo, couh laeglemx baema ranzmeh ndoj hwnjdaeuj.

Daeglwg dauqranz raen daxmeh le, couh cam:“Meh, mboengqneix ndei ba?”

“Ndeindei, lwg gou dauq le couh ndei lo.” Daxmeh han naeuz. “Seizneix mbouj nit, mwngz vihmaz daenj madfwngz? Yah gou bae guh maz?” Daeglwg cam.

“Haxbaenh gou daenj madfwngz bae ndai suen, yah mwngz mbouj rox mwngz ngoenzneix dauq, haetneix de bae ma ranz meh de lo.”

Yaep he, daeglwg youh cam: “Meh, mwngz gaej muenz gou, gou nyienh ciuhvunz mbouj miz yah, hix mbouj nyienh hawj daxmeh deng heiq souh haemz. Gyoengq vunzmbanj cungj lwnh gou nyi lo. De caen dwg yienghhaenx, gou sikhaek gyaep de okbae. Meh, mboengqneix mwngz gwnheiq lai lo.” Daeglwg gangj sat couh daej lo. Bajseiq raen lwg daej, de hix daej hwnjdaeuj, mienh daej mienh naeuz:“Lwg gou naengh in meh, couh saenq daxmeh gangj, mwngz daj iq daengz hung, daxmeh gangj maz mwngz saenq maz. Ngoenzneix, mwngz couh mbouj saenq vah daxmeh la? Gwn haet le, mwngz gwih mozdoz bae ciep yah mwngz dauqma, dou aeu caeuq de……mwngz bae ciep de dauq, ciuq vah gou bae gangj.” Daeglwg naeuz:“Gou saenq daxmeh, ndaej, couh eiq vah mwngz bae guh.”

Lajbyonghngoenz, daeglwg Baj- seiq bae daengz ranz mehdaiq. Yah de raen bouxgvan daeuj, sim diuq- bubbub, mbouj ndei eiqseiq naeuz: “Mwngz daeuj heuh gou bae lizvaen? Mwngz saenq meh mwngz gangj ba.”

Daeglwg naeuz: “Gou cij saenq meh gou gangj, vunz gangj maz gou coenz ndeu mbouj saenq.”

“Meh mwngz gangj gijmaz?” Yah cam.

“De naeuz mwngz gig ndei, haethaemh heuh de daxmeh, baet ranz saeg buh, cawj haeux swiq byaek yienghyiengh ceng aeu guh. De heuh gou daeuj doz mwngz baema.” Daeglwg naeuz.

Yah de daengx da hung naeuz: “Daxmeh caen dwg nyaenx gangj?”

Daeglwg naeuz:“Daxmeh caen dwg nyaenx gangj, dou baema ba.”

Dahbawx naengh youq laeng mozdoz, song fwngz got hwet bouxgvan, aen naj baemz youq gwnz ndang bouxgvan, raemxda laeswsw, ndaw sim gag naeuz:“Gyabuz ha, cungj dwg gou loek lo, gou doiq mbouj hwnj mwngz, gvaqlaeng gou itdingh aeu gaij gij loek bae, ndeindei hauqswnh mwngz. Mwngz gyaez daeglwg mwngz, hix gyaez gou, seizneix, gou cix rox, gij gyaez daxmeh caen hungmbwk ha!”