□ Hoz Saubangj sij Cinz Siengzcouh Liuz Gingliuj Cinz Siengzgen hoiz

Veiz Suveih caeuq Cangh Yungzlinz cungj naeuz: Youzcaih Gozcingh dungzci anbaiz.

Gyoengq dungzci Yungzyen caeux dingq gangj gvaq gij beizheiq Veiz Gozcingh, de mbouj haengj vunz daegbied dakdaih de. Ndigah, yenveij goj mbouj cawj baenzlai byaek, mbouj gwn laeuj lo, seizbienh gwn le donq ndeu.

Gwn ringz gvaq le, Dingh Saulanz cix lwnh Yungzyen ndaem gofoed cingzgvang hawj Veiz Gozcingh caeuq song boux lingjdauj diveij. De naeuz, Yungzyen miz 36 fanh vunz, 28 fanh moux naz, 3 fanh lai moux reih, soqlaiz cungj dwg ndaem song geiq haeux, gya hwnj binaengz lij miz 1/3 doenghgo gvaqdoeng, fukndaem ceij- soq sang, gwn dieglig caeuq feizlig haenq, bwnh haex nyouh mbouj gaeuq, bwnh vafeiz youh noix. Vunzguhnaz vihliux ra bwnh, cijndei hwnj bya bae coemh ndaengq caeuq canj namhbeiz, doeklaeng ndaengq yied coemh yied noix, namhcaznywj hix yied canj yied noix, gwnz ndoi bienq ndoq, ndoeng deng buqvaih, namhraemx laesaet, haeuxgwn mbouj demsou. Daengx yienh vunz bi doek bi demlai, aeu demgya haeuxgwn, couh itdingh aeu guh ndei hong cauh bwnh. Ndigah, dou cij roengzsim youq gaiq “dieggimq” neix sawq ndaem gofoed. Seizneix lij mbouj gamj gangj baenzgoeng lo, hoeng cungj suenq mo ndaej mbangj gvilwd okdaeuj gvaq, ra deng dauq gvicingz gisuz ndaem go- nywjvahoengz caeuq gomaenz hab bonjdieg haenx.

Veiz Gozcingh doiq Yungzyen Yenveij gamj buqcawz maezsaenq, aeueiq gohyoz, genhciz aen gwzming gohyoz daidu lingjdauj caeuq vunz- gisuz、vunzguhnaz giethab guh gohyoz sawqniemh neix gig haenhndei. De naeuz: “Sou baezneix laemxsim ndaej ndei, ndaem gofoed mboujdanh ndaej yungh bwnh, bang demlai haeuxgwn, youh ndaej hoh ndei faexndoeng, baujhoh namhraemx, gijneix dwg gij fuengfap guh yiengh ndeu ndaej ok lai yiengh haenx. Gou lai baez gangj gvaq, mbouj cinj luenh raemj faex, mbouj cinj coemh ndaengq caeuq canj caznywj, miz di vunz vanzlij mbouj rox yienghde guh miz maz haih. Gingniemh sou ndei lai, yaek dawz bae doigvangq hawj daengx gih. Muengh yenveij laebdaeb rom gingniemh, mboujduenh baenaj, sawj haeuxgwn ndaej demsou.”

(caengz sat)