Ndaej bae Baekging Denh’anh- mwnz yawj swng gozgiz, gou ngeix haujlai vunz cungj miz aen siengjmuengh neix. Miz di vunz bae gvaq Baekging, danhseih aenvih gak cungj gak yiengh yienzaen, cix mbouj ndaej bae yawj swng gozgiz, gou bae gvaq Baekging geij baez, hix dwg caengz ndaej bae Denh’anhmwnz Gvangjcangz yawj swng gozgiz gvaq.Ndwen gonq, gou youh bae Baekging hagsib cib geij ngoenz, mbatneix dauqdaej ndaej bae yawj swng gozgiz lo.

Haetde sam diemj lai cung, gou couh hwnqcongz lo, seiq diemj cung, gou couh caeuq geij boux baengzyoux caemh daeuj hagsib haenx daj Cunghyangh Minzcuz Ganbu Yozyen hwnjdin, gvaq aen cungdaeuz lai di, dang dou daeuj daengz Denh- anhmwnz Gvangjcangz seiz, din mbwn gaenq miz di hau lo. Gvaq ancienz genjcaz le, dou bouxboux ciengj gonq lau laeng dwk caenx daengz henz diuz sienqyawj bae, cijraen diuz sienqyawj seiq henz gaenq ndwn rim geij gvaengh vunz lo, dou siengj ra dieg cingq doiq daizgeiz he daeuj ndwn, hoeng gizhaenx gaenq ndwn rim vunz, dou cijndei seizbienh ra dieg yawj ndaej raen daizgeiz he daeuj ndwn caj, mbouj geij nanz, youq baihlaeng dou couh ndwn rim vunz, boux nem boux, yaek doengh di cungj nanz.

Seiq nyied, Namzningz raeuz gaenq dwg va rang roeg ciu, ndit ciuq mbwn raeuj, hoeng Baekging lij dwg nit dangqmaz, rumz cififi, dou yienznaeuz daenj buhlaengj daiq mauh, lij nit ndaej saenzfoebfoeb. Hoeng, baez yawj doengh boux cansw hugizbanh, gyoengqde bouxboux lumj gocoengz nei baenz baiz ndwn youq haenx doengh hix mbouj doengh. Dingq naeuz mboujlwnh dwg seiz nit mwh hwngq, roxnaeuz rumz ci fwn raq, sam bak roek cib haj ngoenz, mbaw gozgiz Denh’anhmwnz Gvangjcangz ciengxlwenx caeuq daengngoenz baih- doeng caemh swng hwnj, siengj daengz gyoengq cansw hugizbanh yaek guh daengz yienghneix gyoengqde mbouj rox aeu geijlai dwgrengz, gij yiliz gyoengqde dwg baenzneix giendingh, gyoengqde hawj dou roxnyinh daengz, dwg gyoengqde yungh ciuhvunz caeuq sengmingh daeuj hen gij cunhyenz guekcoj raeuz. Baenzneix siengj le, dou couh mbouj roxnyinh nit lo.

1949 nienz, Baekging Denh- anhmwnz Gvangjcangz swng mbaw Geizhajsing daih’it Cungguek moq, de naeuz hawj daengx seiqgyaiq nyi: Cungguek yinzminz daj neix ndwn hwnjdaeuj lo! Seizneix, moix ngoenz cungj miz gij ginzcung daj daengx guek gak dieg daeuj daengz Denh- anhmwnz Gvangjcangz yawj swng gozgiz. Swng gozgiz seizgan mbouj dwg ngoenzngoenz cungj doxdoengz, ngoenzneix swng gozgiz dwg haj diemj sam cib gouj faen hainduj. Dang mbwn ciemhciemh rongh hwnjdaeuj seiz, gij daeng Denh’anhmwnz Gvangjcangz couh ndaep lo, gyoengqvunz hix rox daengz gozgiz huveidui couh yaek okdaeuj, bouxboux cungj dwg ngiengx gyaeuj daengj dwk. Sawqmwh mbouj rox dwg byawz hemq naeuz:“Yawj, huveidui okdaeuj lo!” Seizhaenx gij sing cauzcumcum sikhaek caem roengzdaeuj, caezgya cungj yawj bae coh Denh’anhmwnz——yawjraen hugiz yicang duivuj hen dwk gozgiz, moix boux cansw ngiengx gyaeuj enj aek yamqdin cingjcaez miz rengz daj Denh’anhmwnz okdaeuj, gyoengqde byaij gvaq Ginhsuijgyauz, byaij gvaq Gaicangzanhgaih, byaij daengz naj daizgeiz. Haj diemj sam cib gouj faen, gaenq dwk sing “gingqlaex!” aen goujling neix hemq okdaeuj, doengzseiz sing go gozgoh hix yiengj hwnjdaeuj goksasa lo, doenghboux yawj swng gozgiz haenx hix gikdoengh dwk daih sing riengz ciengq gozgoh, haujlai vunz doq ciengq doq raemxda lae ni, mbaw gozgiz youq ndaw sing go gozgoh caeuq vunz cim ndaej de menhmenh swng hwnjbae, gozgoh laebdaeb yiengj sam baez, gozgiz couh swng daengz dingj lo.

Doenghboux daengz Denh- anhmwnz Gvangjcangz bae yawj swng gozgiz, dingzlai dwg bouxyouz daj daengx guek gak dieg daeuj, gyoengqde cungj dwg daj haetromh sam seiq diemj cung couh daeuj daengz Denh’anhmwnz Gvangjcangz lo, miz di gikdoengh dwk baenz hwnz cungj mbouj ninz ni. Daihgya soemh rumz soemh nit, mbwn caengz rongh couh daeuj neix ndwn, couh dwg vih yawj 2 faen lingz 7 miux swng gozgiz neix, youq ndaw song faen lai cung neix, dou cungj youq ndawsim mieng: Dou dwg vunz Cungguek, dou ciengxlwenx aeu sengmingh bae gyaez guekgya! Guekcoj dou mbouj hawj byawz daeuj ciemq!

Dang gou sij mbouj ndaej dwk lizhai Denh’anhmwnz Gvangjcangz seiz, daengngoenz daj baihdoeng swng hwnjdaeuj lo, ndit ciuq youq gwnz Denh’anhmwnz Gvangjcangz rongh- sagsag, hawj dou roxnyinh daengz guekcoj raeuz dwg baenzneix gyaeu- ndei, baenzneix hungmbwk!