●5 nyied 19 hauh, Nanzdanh Yen youq Lijhuz Yauzcuz Yangh Mbanjvangzsang gawjhengz gizdieg Bwzguyauz minzsuz funghcingz hailangh hozdung, neix hawj hekyouz ndaej yawj le Bwzguyauz baenzlawz guh ndangdaenj bonj- faenh、Bwzguyauz funghcingz byaujyenj, caeuq vunz dangdieg caemh gwn ngaiz daizraez.

(Veiz Loz)

●5 nyied 18 daengz 19 hauh, Gunghcwngz Yauzcuz Swciyen Sihlingj Yangh Yangzsih Cunh gyoengq beixnuengx Yauzcuz gawj- banh Ranzgeq Mizmingz Minzsuz Vwnzvacez Nem Daih’it Gaiq Caeq Cwz(vaiz)vuengz hozdung. Baez hozdung neix baijok le lai cungj feihvuzciz vwnzva yizcanj Yauzcuz, hawj bouxyawj yawj ndaej gig mizyinx.

(Cwng Ciminj)

●5 nyied 17 hauh(liggaeuq seiq nyied cobet), gyawj fanh boux daj Gvangjsih、Huznanz、Gveicouh daeuj haenx comz youq Sanhgyangh Dungcuz Swciyen Dungzloz Myauzcuz Yangh, doengzcaez angq gvaq ngoenzciet gingq cwz (vaiz).

●5 nyied 15 hauh banhaet, Bwzswz Si 2013 nienz daih’it geiz doenghboux suhgi mbanj gungzhoj beizyinbanh youq Lingzyinz Yen Yenveij Dangjyau haiban, baez neix gungh guh sam ngoenz. Gungh miz 96 boux suhgi mbanj gungzhoj daj Cingsih、Lingzyinz daeuj haenx camgya le beizyin.

(Vangz Yenzyungz Vangz Dalungz)

●5 nyied 14 hauh, Sihlinz Yen Minzcuzgiz daengxcungq ganbu cizgungh bae daengz Sihbingz Yangh Bingzsang Cunh gaihcanj“hawj lajmbanj cinghseuq”hozdung.(Lij Cwngzyoz)

●5 nyied 10 hauh, Dasinh Yen gawjbanh“vujdaiz hung henzguek·ngoenzngoenz yienj”Dunghnanzya funghcingz cien- ciengz vanjvei. 90 lai boux liuzyozswngh daj Daigoz、Yeznanz、Yinniz daengj guekgya daeuj haenx nem gyoengq bouxcoz Dasinh Yen itheij ciengq go diuq foux、doxgyau guhdoengz. (Banh Hungz)