□ Hoz Saubangj sij Cinz Siengzcouh Liuz Gingliuj Cinz Siengzgen hoiz

15、Cangdauj Gvangqlangh Ndaem Gofoed

Bi 1962 ndwen 11 co, Veiz Gozcingh ngamq laebdaeb ndaej senj guh Gvangjsih Bouxcuengh swcigih daihngeih baez daibyauj daihhoih daihit suhgi, de gipmuengz bae daengz Yilinz Digih, caemhcaiq caeuq gij goengdaeuz Yilinz Digih Veiz Suveih、Cangh Yungzlinz guhdoih, bae daengz Yungzyen liujgaij gij cingzgvang gyoengqde sawq ndaem gofoed baenzgoeng haenx.

Mwh hoenxciengq, Veiz Goz- cingh ciengzseiz youq Vaizbwz、Suhbwz gij dieg neix hoenxciengq, gvaqlaeng youh bae baihnamz Suh- couh guh hong, de doiq gij lajmbanj Suh、Vanj seizdoeng ndaem gofoed gig miz yaenqsiengq. Dauq daengz Guengjsae le, de itcig cungj naemj, ndaej mbouj ndaej lumj Suh、Vanj yienghde, gvangqlangh ndaem gofoed daeuj cauh bwnh ne.

Gvaqlaeng, de liujgaij daengz, Yienh Cenzcouh dieg baihbaek Guengjsae neix, caengz gaijfang couh ndaem gofoed, vunzmbanj naeuz: “Naz mbouj miz bwnhfoed, diuzhanz rap raek goj nanz biz”. Seizneix gyoengqde vanzlij ndaem dwk. Diegrangh Gveiqnamz, 50 nienzdaih co sawq ndaem gvaq nywjvahoengz dingz gofoed go duh neix, aenvih ndaemganq gisuz mbouj gvaqgvan, saetbaih lo. Boux vunzhong gohyoz nungzyez guek raeuz, youq ndaw saw de naeuz, go’nywjvahoengz “diuzgienh cinvaq dwg sezsi 0 doh daengz 8 doh, aeu ndaej 35 ngoenz doxhwnj”. Youq Guengjsae, gij dieg baihnamz gvaq Liujcouh le haenx couh mbouj hab gij diuzgienh haenx, ndigah, Gveiqnamz itcig deng dangqguh gaiq “dieggimq” go- nywjvahoengz.

(caengz sat)