Cietcieng ngamq gvaq, dienheiq baihnamz lijdwg seiz raeuj seiz nit. Mwh doenghgo lij youq geh raemxmok ninzdoeng caengz singj, goreux gaenq laeglemx youq gij nyefaex ndoqliuliu haenx dok ok makndot. Mbouj rox mbouj nyinh, makndot aen riengz aen okduj angjva. Goreux bauqhawj vunz nyi: Seizcin daengz lo.

Ranzmbanj gou goreux gig lai, gwnz bo、henz rij、haenzdah、gyangdoengh cungj maj miz. Goreux ceiq lanhmaj, lij iq caeuq daxmeh bae bo raemj faexreux daeuj guh donghsuen, gvaqlaeng de cungj rox dok rag maj baenz faex ne! “Miz va mbouj miz mbaw, miz mbaw mbouj miz va; Va mbaw mbouj caemh raen, gode sang geij ciengh”. Vunzmbanj rox aeu geij gawq vah neix daeuj beijgangj goreux. Lij geiq ndaej diuz go 《Lwgminz Bouxcuengh Danqciengq Mauz Cujsiz》ciengq daengz: Vareux hai le hoengz fanh leix, henz Dahhungzsuijhoz singgo hwnj, lwg- minz Bouxcuengh danqciengq Mauz cujsiz……Daj mwh roxsoq hwnj, moix bi mwh vareux angjhai, sim gou hix angqyangz hwnjdaeuj……

Doengh go vareux ranzmbanj, dwg goreux gyaeujmbanj va ceiq lai ceiq hoengz. Ngamq haeuj seizcin, lajgo de couh nauhyied lo, mboujdanh lwgnyez maij youq gizde gip va guhcaemz, bang roegluek、roeggeuq hix maij daeuj “guhcaemz”, gij roeg neix youq gwnz faex diuq bae saet dauq caemz va mbouj dingz. Mwh vareux angjhai ndaej 10 ngoenz baedauq, bungzdaengz miz rumz ci daeuj, vareux couh lumj aen loekrumz nei baenqliklik doek roengzdaeuj, bang lwgnyez dou couh doxciengj bae gip va, gip daeuj guh daengloengz、guh lujgaeq、guh aengienq.

Goreux youq baihnamz guek raeuz cix miz. Seizneix Gvangjcouh Si、Banhcihvah Si、 Daizvanh Gauh- yungz Si sam dieg neix lij aeu vareux guh sivah. Aen byauhciz Nanzfangh Hangzgungh Gunghswh hix dwg vareux. Goreux haengj maj youh sang, dujva de youh hung youh hoengz, ndigah vunz hawj de an mingzcoh he heuhguh “vayinghyungz”. Gou cazyawj gvaq swhliu, Handai gaenq miz saw geiqdaengz vareux. Aen mingzcoh “vayinghyungz” neix dwg Cinghcauz cauxok. Lij geiq ndaej mwh lij iq bouxgeq lwnh gojgaeq vareux: Mwh Baeuqroxdoh ngamq cauxok mbwn- deih, aenmbwn lij daemqded faexsaux daemj ndaej deng, doenghgo hix maj mbouj sang, vareux hix mbouj dwg saekhoengz. Dieg Lingjnanz miz daeg mbauq ndangcangq hwetmaengh he, rengz hung gah duzvaizdaeg, hoenxciengq maenh’ak raixcaix. Miz baez he, de daiq bing bae hoenxciengq seiqcib gouj ngoenz, doeklaeng iekbaeg gvaqbouh, ngaiz vunzdig gaemh lo. Vunzdig dawz de cug youq goek goreux, bik de douzyangz, hoeng de dingjgengz daengz daej, doeklaeng deng vunzdig gaj dai youq laj goreux, lwed de dawz namh seiqhenz nyumx hoengz liux. Daj bide hwnj, vareux bienqbaenz saekhoengz lo, goreux hix yied maj yied sang, dingj dwk aenmbwn hwnj gwnzsang bae youq. Doeklaeng vunzbiengz naeuz saek vareux hoengzfwdfwd dwg lwed bouxyingh- yungz nyumx baenz, goreux sangvauvau dwg ndangngaeuz boux- yinghyungz.

Seizneix，saedceij raeuz ngoenz beij ngoenz ndei, vunz haengj aeu gak yiengh va daeuj canggyaeu diegyouq, ndaw gunghyenz ciengzseiz baijok gak cungj va. Hoeng gou roxnyinh gij va neix unqnyieg lai, aeu vunz rwed raemx ganqhoh cix maj. Gij va neix baenzlawz beij ndaej vareux ne? Mwngz yawj, gwnz dat、laj langq、henz rij cungj miz goreux. Vareux mbouj lau nit, mbouj yungh vunz rwed raemx ganqhoh, mbouj yungh mbawheu daeuj doxbaengh. Mwh de angjhai, dujduj venj youq byaifaex lumj bogfeiz、lumj daengloengz、lumj singhajgak. Vareux hawj vunzbiengz daiq daeuj heiq seizcin, daiq daeuj gingj gyaeundei seizsin. Gij gingj gyaeundei neix mbouj lau fwn rwed ndit dak caeuq loenqsaek, de hawj vunz roxnyinh sengmingh dwg yiengh mbouj dingz mbouj duenh he!

Youq ranzmbanj, sinzcin vadauz、vamaenj hix daeuj ndaej caeux, hoeng gyoengqde noix gij heiqseiq hung- mbwk haenx, gyoengqde baenz benq baenz caz cix yinx ndaej lwgda vunz, dauqdwg goreux youh hung youh sang gamqgvaq seiqhenz, mwh vareux hai caez, ndwn youq laj goek roxnyinh de angj hoengz mbiengj mbwn, hawj vunz yawj mbouj rox mbwq. Mbouj miz yiengh va lawz lumj vareux, doek- roengz laj go saek lij hoengz yienghgaeuq, gaenqva youh bienq- baenz makgvak, ndaw miz faiqreux, cauxfuk vunz biengz. Neix couhdwg yiengh bonjsaek “vayinghyungz”!

Diegcuengh dwg baihnamz guekcoj, ciuhgeq gvaqdaeuj, dieg goreux haengj maj neix couh ok bouxyinghyungz lai raeuh: Nungz Cigauh、Vajsifuhyinz、Ginz Cunhsenh bohlwg、Fungz Swjcaiz、Liuz Yungjfuz、Luz Yungzdingz、Veiz Bazginz、Veiz Gozcingh doengh boux yinghyungz. Gij ndangngaeuz ronghsag gyoengqde lumj goreux nei sangvitvit, hawj vunz ciengxlwenx geiq ndaej.

Yawjraen vareux, gou couh siengj daengz seizcinz, siengj daengz seizcin, gou youh siengj hwnj bi 1979 mwhde.

Bide vih dingjhoenx vunzdig daeuj ciemq dieg guekcoj, baenz cien gvaq fanh lwgcoz youq dieg baihnamz vutmingh bonjfaenh. Seizneix gwnz vangjloz “Dezhez Segih” daeng miz gij faenzcieng hoenxciengq, lumj《Vareux Vihmaz Baenz Hoengz》、 《Vareux Ngaiz Lwed Nyumx Haenx》, gij faenzcieng neix cungj dwg dauqngeix ciengz hoenxciengq 30 lai bi gonq haenx. Gou geiq ndaej ndawde miz duenh vah he: Bi 1979-1985, vih mbouj hawj vunzdig daeuj ciemq saek conq namh baihnamz guekcoj, bang vunzcoz he ‘ciengxlwenx ninz’ youq lajgo faexreux dieg baihnamz. Gyoengqde dingzlai lij dwg 18、19 bi, gyoengqde yungh lwed nyumx hoengz diegnamh baihnamz guekcoj, dwg miz gij lwed neix daeuj rwed, vareux dieg baihnamz cix hai ndaej hoengz- fwdfwd……

Dwg ha, yiengh goreux sangvitvit couh lumj bouxbing nei, fwngz gaem cungq hensouj aendou hung baihnamz guekcoj; yiengh vareux hoengzfwdfwd lumj naed singhajgak gwnz mauh gyoengqde, youq laj ndit lwenq- myagmyag.

Ndwensam bak va ceng hai, vareux hai ndaej hoengz lumj feiz. Raeuz ciengxlwenx geiq maenh gij gojgaeq vareux hoengzfwdfwd neix!