Seizcin rumz lai, rumz baet gojnwngz rox yinxhwnj vunzraeuz baenz gak cungj binghlah. Lumj dwgliengz、beghouz、mazcimj、liuznauj、dokraemx、benjdauzdij in、feiyenz daengj, ndigah, seizcin aeu daegbied haeujsim yawhfuengz gij bingh neix.

Seizcin dwg aen geiqciet doeng hah cienjvuenh doxlwnz ndeu, rumznit rumzraeuj doxgyauca, seiz nit seiz raeuj, yaep bumz yaep gvengq, aenmbwn bienqvaq mbouj dingh. Aenmbwn mbouj onjdingh, bouxvunz doiq aenmbwn minjganj haenx couh nanz sikhab lo. Ndigah, boux minjganj aeu haeujsim diuzcez gwnninz.

Heiqdaep、heiqhuj yungzheih gaenriengz heiq seizcin swng hwnj, heiqdaep hoenghvuengh, rox hawj vunz baenz hezyaz sang、da raiz、ganhyenz. Heiqdaep hoenghvuengh hix rox hawj cingsaenz cingzsi bouxvunz fatangq, bouxvunz yungzheih gaenriengz aenmbwn bienqvaq fathuj、cauznauh.

Seizcin aenmbwn bienq raeuj, heiqlwed bouxvunz hozdung hix gaenriengz gyagiengz, aenndang sup haeuj caeuq baiz ok caemh vuengh hwnjdaeuj. Doiq cungj bienqvaq neix, boux ndang ndei cix sikhab ndaej vaiq, boux ndang nyieg bingh lai caeuq bouxlaux、lwgnyez couh nanz sikwngq lo, bingh gaeuq yungzheih fukfat roxnaeuz binghcingz gyanaek. Ndigah, seizcin fuengz bingh aeu caeux guh ndei cunjbei cij ndaej.