Gou daj haeujhag daengz seizneix, ginggvaq haujlai “baez daih’it”, lumjbaenz baez daih’it gaujsi, baez daih’it ndaej ciengj, baez daih’it hwnjmuengx, baez daih’it…… Hoeng, hawj gou geiq ndaej ceiq laeg dwg baez daih’it cawjngaiz. Baez siengj hwnj gienh saeh neix, gou couh riu bak mbouj haep.

Haenx dwg ngoenz singhgiz ndeu, daxboh daxmeh cungj mbouj youq ranz, gou siengj gou coengzlaiz mboujcaengz bang daxmeh guh gvaq hongranz, baez neix caen dwg ndei seizhaeuh, sojyij couh cawj baez ngaiz ndeu ba, hawj daxboh daxmeh loh fwngz he, hawj gyoengqde sim’angq sim’angq baez ndeu.

Gangj guh couh guh, gou sien dauz haeux, dingq daxmeh gangj gvaq haeuxngaiz aeu dauz song sam baez cij ndaej, gou couh hag gij yiengh daxmeh dauz haeux lo. Hoeng, dauz baez haeux he, couh miz di “lwgmanz” swnh raemx “ndotdeuz”, ndigah, dauz ndaej le haeux couh noix bae sam faenh cih it lo. Gou dawz haeux dauz ndei haenx boek haeuj ndaw gu bae, cap doeng dienh, couh gag hwnjmuengx bae saj lo.

Gou cingq saj ndaej mizyinx seiz, mbouj rox daj gizlawz cienz daeuj gij sing “bili bala”. Gou swnh sing ra bae, fatyienh dwg daj ndaw bakcauq cienz daeuj, gou sikhaek siengj daengz gu ngaiz haenx, biengj hai fagu baez yawj, ha, mbwn ha, gij ngaiz neix dwg gou cawj ma? Gij saek caengz ndaem caengz henj, sawq gwn di he, “bibi”, geng lumj rinreq, lij haemzningj dem. Neix baenzlawz guh ne? Gou simgip lumj duzmoed youq ndaw gu ndat, cienq bae cienq dauq, mbouj rox baenzlawz guh cijndei. Gou cingq youheiq seiz, daxboh daxmeh dauqma lo. Daxmeh cam: “Dahlwg, mwngz guh gijmaz ha?” Gou gazdwdgwd naeuz:“Gou……gou……guh……guh……” “Yi, gijmaz feihdauh?” Daxmeh mupmup aen ndaeng, de itmienh cam itmienh caeuq daxboh byaij haeuj ndaw bakcauq, baez yawj cungj mingzbeg lo, “hahaha……” Song boux de riu hwnjdaeuj, daxmeh bonjlaiz couh gyaez riu, seizneix riu ndaej raemxda lae okdaeuj lo, daxboh hix riu dwk hwet gungj lo. Doeklaeng gou cij rox, dwg aenvih gou cawj ngaiz seiz lumz cuengq raemx lo, cij deng remj baenz yienghneix.

Gou siengj: Mboujlwnh guh gijmaz saeh, aeu sijsaeq gvanhcaz, hawsim hagsib, cij ndaej guhbaenz.                 （指导老师：覃珍团）